बोल बम” के जयघोष मं शिवभक्त मन ला जिला प्रेस क्लब कवर्धा के सेवा, रेगाखार चौक मं स्वल्पाहार पाय के गदगद होइस पदयात्री
बल्लूराम डॉट कॉम
विजय धृतलहरे
कवर्धा। श्रावन महीना के पहिली सोमवार के पावन अवसर मं बुढा महादेव मंदिर कवर्धा ले भोरमदेव धाम तक निकले 18 किलोमीटर लंबा पदयात्रा मं शामिल हजारों शिवभक्त मन बर जिला प्रेस क्लब कवर्धा ह हर साल के जइसने ए साल घलो श्रद्धा अउ सेवा भाव के संग स्वल्पाहार के व्यवस्था करिस।
रेगाखार चौक मं लगाए गे सेवा शिविर मं पदयात्री मन ला पानी, चाय, नास्ता सहित स्वल्पाहार कराए गीस। लंबा पैदल सफर के बीच पत्रकार मन के ए सेवा ला शिवभक्त मन ह खूब सराहिन अउ जिला प्रेस क्लब के प्रति आभार जताइन।
ए साल के भोरमदेव पदयात्रा मं अब तक के सब्बो रिकॉर्ड टूट गे। हजारों के संख्या मं शिवभक्त मन “हर-हर महादेव” अउ “बोल बम” के जयघोष करत भोरमदेव धाम पहुंचिन। पदयात्रा मं उप मुख्यमंत्री विजय शर्मा, जिला के जनप्रतिनिधि, पूर्व कलेक्टर कोमल परदेशी, आर. संगीता, पी. दयानंद, वर्तमान कलेक्टर गोपाल वर्मा, पुलिस अधीक्षक जितेन्द्र यादव, जिला पंचायत के मुख्य कार्यपालन अधिकारी अभिषेक अग्रवाल, पूर्व सीईओ कुंदन कुमार सहित जिला प्रशासन के अधिकारी-कर्मचारी, सामाजिक कार्यकर्ता अउ भारी संख्या मं छात्र-छात्रा शामिल रहिन।
जिला प्रेस क्लब कवर्धा के सेवा शिविर मं पहुंचके अतिथि मन अउ पदयात्री मन पत्रकार मन के सेवा भावना के खुलके सराहना करिन। ए अवसर मं जिला प्रेस क्लब के अध्यक्ष प्रकाश वर्मा, उपाध्यक्ष यशवंत सिंह ठाकुर, कोषाध्यक्ष डी.एन. योगी, सचिव विजय धृतलहरे, कार्यकारिणी सदस्य ईश्वर कुंभकार, देवेन्द्र चन्द्रवंशी, श्याम टंडन, रसीद खान, जल्लू साहू, शत्रुघ्न मानिकपुरी, आयुष वर्मा, चुनवा खान, विकास शुक्ला सहित बड़ी संख्या मं पत्रकार मन सेवा कार्य मं जुटे रहिन।
श्रद्धा, सेवा अउ समर्पण के ए मिसाल ह फेर एक बार साबित कर दिस कि पत्रकार मन सिरिफ खबर नई बनावंय, बल्कि समाज सेवा के हर अवसर मं घलो बढ़-चढ़ के अपन जिम्मेदारी निभावंय।
