डबरी के सरपंच ऊपर अविश्वास प्रस्ताव फेल, जनता के भरोसा ला मिलिस जीत, अफवाह ले बांचे के अपील

बल्लूराम डॉट कॉम

विजय धृतलहरे

पंडरिया/कबीरधाम।27/07/2026 जनपद पंचायत पंडरिया के ग्राम पंचायत डबरी मं सरपंच चंद्रकांता योगेश जांगड़े के खिलाफ लाए गे अविश्वास प्रस्ताव सफल नइ हो सकिस। मतदान के बाद सामने आए जानकारी अनुसार सरपंच के पक्ष मं 4 वोट अउ अविश्वास प्रस्ताव के समर्थन मं 10 वोट परे।

सरपंच पक्ष के समर्थक मन के कहना हे कि अविश्वास प्रस्ताव के संबंध मं कानूनी प्रक्रिया के पालन होय हे अउ सक्षम अधिकारी जऊन निर्णय सुनाइन, वही आधिकारिक माने जाही। समर्थक मन ये घलो कहिथें कि गांव के विकास अउ जनहित के काम ला अब पहिली जइसने गति ले जारी रखे जाही।

मतदान के बाद तहसीलदार राजश्री पाण्डेय सरपंच चंद्रकांता योगेश जांगड़े ला शुभकामना देके पंचायत के विकास कार्य ला बेहतर ढंग ले आगे बढ़ाय बर कहिन। एखर बाद सरपंच समर्थक मन मं खुशी के माहौल देखे गीस।

सरपंच पक्ष के कहना हे कि कुछ लोग मन बिना आधिकारिक दस्तावेज के तरह-तरह के चर्चा अउ भ्रम फैलाय के कोशिश करत हें। अइसन मं प्रशासन जऊन आधिकारिक आदेश जारी करही, ओही ला अंतिम मानना चाही। गांव के जनता ला अफवाह ले दूर रहिके विकास के काम मं सहयोग करे के अपील घलो करे गे हे।

ग्राम पंचायत डबरी मं अब सबो के नजर प्रशासन के आधिकारिक स्पष्टीकरण ऊपर हे। सरपंच पक्ष के कहना हे कि पंचायत के विकास, पारदर्शिता अउ जनता के भरोसा ला कायम रखे बर वो मन लगातार काम करत रहिहीं।