विजय धृतलहरे | बल्लूराम डॉट कॉम | पंडरिया/कबीरधाम
पंडरिया। पंडरिया विधानसभा के कुण्डा अंचल बर एक ठन बड़े खुशखबरी आय हे। विधायक भावना बोहरा के लगातार प्रयास के बाद राज्य सरकार ह कुण्डा म नवा सामुदायिक स्वास्थ्य केंद्र (सीएचसी) बनाय बर ₹2 करोड़ 50 लाख के प्रशासकीय मंजूरी दे दीस हे। एखर संग अस्पताल के संचालन बर डॉक्टर, विशेषज्ञ डॉक्टर, नर्सिंग स्टाफ, लैब टेक्नीशियन सहित कुल 56 नवा पद घलो मंजूर करे गे हे।
ए नवा अस्पताल बन जाही त 50 ले जियादा गांव के हजारों परिवार मन ल अपन इलाका म बढ़िया अऊ समय पर इलाज के सुविधा मिलही। अब गंभीर इलाज बर दूर-दराज अस्पताल जइय्या के परेशानी घलो कम होही।
विधायक भावना बोहरा कहिन कि कुण्डा के जनता के बरसों पुराना मांग आज पूरा होवत हे। ए सिरिफ एक ठन भवन के मंजूरी नइ, बल्कि हजारों परिवार बर सुरक्षित अऊ बेहतर स्वास्थ्य सेवा के भरोसा आय। मुख्यमंत्री विष्णुदेव साय के घोषणा ल पूरा करत सरकार ह ग्रामीण अंचल के स्वास्थ्य सुविधा मजबूत करे के दिशा म महत्वपूर्ण कदम उठाय हे।
विधायक ह मुख्यमंत्री विष्णुदेव साय अऊ स्वास्थ्य मंत्री श्याम बिहारी जायसवाल के प्रति आभार जतावत कहिन कि डबल इंजन सरकार प्रदेश के आखिरी मनखे तक बेहतर इलाज पहुंचाय बर लगातार काम करत हे।
भावना बोहरा कहिन कि अस्पताल म सिरिफ भवन बनना जरूरी नइ, बल्कि पर्याप्त डॉक्टर अऊ कर्मचारी के व्यवस्था घलो जरूरी हे। एही सोच के साथ 56 नवा पद के मंजूरी दे गे हे, जेखर ले अस्पताल म नियमित अऊ गुणवत्तापूर्ण इलाज मिल सकही।
ओमन बताइन कि पंडरिया विधानसभा म अभी घलो 8 निःशुल्क एम्बुलेंस 24 घंटे सेवा देत हवंय, जेन ले आपातकालीन स्थिति म हजारों लोगन ल समय पर मदद मिलत हे। संग म निःशुल्क मोबाइल हेल्थ पैथ लैब दूरस्थ अऊ वनांचल गांव पहुंचके ग्रामीण मन के स्वास्थ्य जांच करत हे।
विधायक ह कहिन कि “हमर पंडरिया – स्वस्थ पंडरिया” हमर संकल्प आय। विधानसभा के हर नागरिक तक बढ़िया अऊ त्वरित स्वास्थ्य सुविधा पहुंचाय बर हमन लगातार काम करत रहिबो।
