बल्लूराम डॉट कॉम
विजय धृतलहरे | कबीरधाम
कवर्धा। कबीरधाम जिला के भोरमदेव थाना इलाका ले एक हिला देय वाला मामला सामने आइस। गांव चौरा के 28 बछर के चैती बाई बैगा, जे 26 जुलाई ले लापता रहिस, ओकर क्षत-विक्षत लाश गांव ले करीब 200 मीटर दूर जंगल-झाड़ी म मिलिस। घटना के बाद इलाका म सनसनी फैल गे हे।
पुलिस के मुताबिक, 1 अगस्त 2026 ला झंगल बैगा अपन पत्नी के गुम होए के रिपोर्ट थाना भोरमदेव म दर्ज कराइस। रिपोर्ट मिलतेच पुलिस, परिजन अउ गांव वाले मिलके महिला के खोजबीन शुरू करिन।
तलाश के दौरान जंगल म एक सेन्हा रूख ऊपर महिला के साड़ी बंधाय मिलिस। सूचना मिलतेच थाना भोरमदेव के पुलिस, वरिष्ठ अधिकारी अउ फोरेंसिक टीम घटना स्थल पहुंचके बारीकी ले जांच शुरू करिन।
रूख के नीचे अउ आसपास मानव खोपड़ी, पसली अउ पैर के हड्डी अलग-अलग जगह म बिखरे मिलिस। शुरुआती जांच म अइसन आशंका जताय जात हे कि मौत के बाद जंगली जानवर मन लाश ला नोच-खसोट करके अलग-अलग जगह लेगे होहीं।
पुलिस घटना स्थल ले सबूत अउ मानव अवशेष मन ला वैज्ञानिक तरीका ले जप्त करिस। परिजन मन चूड़ी अउ दूसर पहचान चिन्ह के आधार ऊपर लाश के पहचान चैती बाई बैगा के रूप म करिन।
पुलिस मर्ग कायम करके शव के अवशेष ला पोस्टमार्टम बर जिला अस्पताल कवर्धा भेज दिस हे। पुलिस कहिथे कि पोस्टमार्टम रिपोर्ट, फोरेंसिक जांच अउ वैज्ञानिक साक्ष्य के बादे मौत के असली कारण सामने आही। फिलहाल मामला के हर पहलू ले जांच जारी हे।
