सतनामी समाज के संगोष्ठी म संत-महंत, अधिकारी-कर्मचारी अउ समाजसेवी मन होइस सम्मानित, छात्रावास म निःशुल्क लाइब्रेरी के उद्घाटन
कवर्धा। कबीरधाम जिला सतनामी समाज अधिकारी-कर्मचारी अउ माता सफूरा सावित्री कमेटी के आयोजन अउ नेतृत्व म 6 सितंबर 2026 के सतनाम भवन कवर्धा म महान प्रतापी राजा गुरु बालक दास जी के जयंती संगोष्ठी कार्यक्रम धूमधाम ले मनाय गीस। कार्यक्रम म गुरु बालक दास जी के जीवन संघर्ष, त्याग, तपस्या, बलिदान अउ सामाजिक विचार ऊपर विस्तार ले चर्चा होइस।
कार्यक्रम म सतनामी समाज के जिला अध्यक्ष रामप्रसाद मिरी, उपाध्यक्ष कमलकांत बंजारे, बहुजन विचारक डॉ. जयप्रकाश बंजारे सहित सामाजिक महिला नेत्री, समाजसेवी, अधिकारी-कर्मचारी, शिक्षक-शिक्षिका, संत-महंत अउ समाज के बड़ी संख्या म लोग शामिल होइस। बस्तर ले संत मन्नूलाल चतुर्वेदी अउ दुर्ग ले संत उत्तम महिलांगे सहित विभिन्न क्षेत्र ले आए अतिथियन के सम्मान करे गीस।
नवा ग्राम कमेटी के पदाधिकारी मन के सम्मान
कार्यक्रम के दौरान सतनामी समाज के ग्राम कमेटी म नवा निर्वाचित अध्यक्ष अउ सचिव मन ला प्रमाण पत्र देके सम्मानित करे गीस। शिक्षक दिवस के अवसर म उपस्थित अधिकारी-कर्मचारी, शिक्षक अउ शिक्षिका मन ला घलो प्रमाण पत्र देके सम्मानित करे गीस। कार्यक्रम म उपस्थित संत-महंत अउ कलाकार मन के भी सम्मान कर समाज सेवा अउ सामाजिक योगदान के सराहना करे गीस।
छात्रावास म खुलिस निःशुल्क लाइब्रेरी
राजा गुरु बालक दास जी के जयंती के अवसर म बालक छात्रावास म माता सफूरा सावित्री कमेटी अउ समाज के बुद्धिजीवी मन के सहयोग ले तैयार करे गे निःशुल्क लाइब्रेरी के उद्घाटन करे गीस। आयोजक मन कहिन कि लाइब्रेरी के लाभ सर्व समाज के छात्र-छात्रा मन ला मिले, ताकि पढ़ई-लिखई के संग प्रतियोगी परीक्षा अउ कैरियर के तैयारी म मदद मिल सके।
हर ब्लॉक म जयंती अउ संगोष्ठी कराए के आह्वान
संगोष्ठी म समाज के लोगन ले आग्रह करे गीस कि राजा गुरु बालक दास जी के विचार, त्याग अउ सामाजिक चेतना ला जन-जन तक पहुंचाय बर हर ब्लॉक म जयंती अउ संगोष्ठी कार्यक्रम आयोजित करे जाय। गुरु बालक दास जी के बताए समानता, शिक्षा, सामाजिक एकता अउ मानवता के मार्ग म चलके समाज ला आगे बढ़ाए के आह्वान करे गीस।
हर रविवार होथे ध्यान-साधना
माता सफूरा सावित्री कमेटी के संयोजिका मन बताइन कि सतनाम भवन, नई मंडी के पास कवर्धा म हर रविवार बिहान 10 बजे ले दोपहर 12 बजे तक ध्यान-साधना संचालित होथे। सर्व समाज के लोगन ला मन के शांति अउ सकारात्मक बदलाव बर ध्यान-साधना म शामिल होए के आग्रह करे गे। महीना के पहिली रविवार ला विशेष कार्यक्रम रखे जाथे, जेमे सहभागियन बर पार्ट लंच के व्यवस्था घलो रहिथे।
कमेटी के माध्यम ले समाज म छूटे परिवार मन ला आपस म जोड़ए के काम घलो करे जावत हे। आयोजक मन कहिन कि तनाव, चिंता अउ अनिद्रा जइसन समस्या ले जूझत लोग मन अपन जीवन म सकारात्मक बदलाव लाए बर ध्यान-साधना म जरूर शामिल होवय।
कार्यक्रम के समापन म गुरु बालक दास जी के विचार, त्याग अउ बलिदान ला अपन जीवन म उतारए के संकल्प लेवत हुए सर्व समाज के मंगलकामना करे गीस।
भवतु सब्ब मंगलम्।
