📍 गिरौदपुरी/छत्तीसगढ़, 28 मार्च
छत्तीसगढ़ के महान संत, समाज सुधारक अउ वीर योद्धा राजा गुरू बालक दास जी के जीवन गाथा आज घलो समाज बर प्रेरणा के स्रोत बने हवय। गुरू घासीदास जी के सुपुत्र के रूप मं जनम लेके उहाँ अपन पूरा जिनगी समाज के उत्थान, समानता अउ न्याय खातिर समर्पित कर दिस।
भादो कृष्ण अष्टमी सन् 1795 मं गिरौदपुरी मं जनमे गुरू बालक दास जी, बचपन लेच धर्म, सेवा अउ समाज सुधार के राह मं चलिन। राजसी ठाठ-बाट मं रहिके घलो उहाँ गरीब, पीड़ित अउ शोषित मन बर लड़त रहिन।
🌿 समाज सुधार के अनोखा मिसाल
गुरू बालक दास जी समाज मं फैले कुरीति ला खत्म करे बर खुद उदाहरण बनिन। बाल विधवा राधा माता संग विवाह करके उहाँ नारी सम्मान अउ समानता के मजबूत संदेश देइन। ए कदम ले समाज मं नई सोच के शुरुआत होइस।
⚔️ सतनाम सेना के गठन
समाज के रक्षा बर उहाँ “सतनाम सेना” के गठन करिन। ए सेना मराठा अउ पिंडारी अत्याचार ले जनता के रक्षा करिस। गाँव-गाँव मं रावटी लगाके सतनाम धर्म के प्रचार करिन अउ लोगन ला संगठित करिन।
🛕 धर्म अउ संस्कृति के विकास
भंडारपुरी मं मोती महल अउ गुरुद्वारा बनवाके उहाँ धार्मिक आस्था ला मजबूत करिन। “बुरा मत देखव, बुरा मत सुनव, बुरा मत कहव” जइसन संदेश देके समाज ला सही दिशा दिखाइन। चांद-सूरज जैतखाम आज घलो सतनाम के पहचान बने हवय।
⚖️ न्याय के प्रतीक
गुरू बालक दास जी “सतनाम न्यायालय” चलावत रहिन, जिहां गाँव के विवाद ला सुलझाय जावत रहिस। उहाँ के न्याय प्रणाली सरल, निष्पक्ष अउ जनहितकारी रहिस।
🔥 स्वतंत्रता संग्राम मं भूमिका
अंग्रेज शासन के खिलाफ गुरू बालक दास जी वीर नारायण सिंह संग मिलके संघर्ष करिन। उहाँ के विद्रोह ले अंग्रेज शासन हिल गीस।
👑 राजा के उपाधि अउ साजिश
अंग्रेज मन उहाँ के जनसेवा ले प्रभावित होके “राजा” के उपाधि देइन, फेर बाद मं धोखा देके उहाँ के खिलाफ साजिश रच डारिन।
🕊️ शहादत के अमर गाथा
28 मार्च 1860 मं औराबांधा मं गुरू बालक दास जी शहीद हो गइन। अंतिम समय मं उहाँ कहिन—
“सतनाम के प्रचार चारों खुट मं करहू”
🌺 आज घलो जीवित परंपरा
भंडारपुरी मं उहाँ के समाधि आज घलो आस्था के केंद्र हवय, जिहां लाखों श्रद्धालु हर साल जयंती अउ शहादत दिवस मं जुटथें।
