सहसपुर लोहारा के मोहम्मद शाहिद खान हज यात्रा बर रवाना, गांव म भावुक विदाई के माहौल”
बल्लूराम डॉट कॉम
विजय धृतलहरे
कवर्धा/सहसपुर लोहारा, 03 मई 2026।
सहसपुर लोहारा विकासखंड के जमुनिया गांव के रहइया अउ शासकीय राशन दुकानदार एवं विक्रेता कल्याण संघ छत्तीसगढ़ के संरक्षक अउ अध्यक्ष मोहम्मद शाहिद खान हज यात्रा बर 2 मई के रवाना हो गिन। हज यात्रा मुस्लिम समाज बर बहुत पवित्र अउ महत्वपूर्ण मानें जाथे, जऊन हर एक सक्षम मुसलमान के जिनगी म एक बेर जरूर करे के परंपरा हवय।
गांव जमुनिया म शाहिद खान के विदाई के बेरा भारी संख्या म परिवार के लोगन अउ समाज के मनखे मन जुटे रहिन। सबो झिन मिलके बड़े ही श्रद्धा अउ सौहार्द के माहौल म हज यात्रा बर उनकर विदाई करिन। ये बेरा माहौल भावुक घलो रहिस, काबर कि हज यात्रा ला खुदा संग मिलन के अवसर माने जाथे।
बताय जावत हे कि मोहम्मद शाहिद खान कई साल ले हज यात्रा बर तैयारी करत रहिन, अउ अब जाके उनकर ये मनोकामना पूरा होइस। वो मन मुंबई ले मदीना बर रवाना होहीं अउ मक्का के दर्शन करत करीब 46 दिन के हज यात्रा पूरा करके वापस अपन घर लौटहीं।
मुस्लिम समाज म मान्यता हवय कि हज यात्रा ले मनखे के जीवन म बदलाव आथे, वो मोह-माया ले दूर होके खुदा के बताय रद्दा म चलथे अउ अपन जीवन ला नेक काम म लगाथे। हज पूरा करके लहुटे वाला ला “हाजी” के सम्मानित उपाधि देय जाथे, जऊन समाज म बहुत आदर के चिन्ह आय।
शाहिद खान के हज यात्रा बर गांव अउ क्षेत्र म खुशी के माहौल हवय अउ संघ के अलावा सबो झिन उनकर सफल यात्रा बर दुआ करत हवंय।
