साइबर ठगी के खिलाफ छत्तीसगढ़ पुलिस के महासंग्राम, 15 अगस्त ले 2 अक्टूबर तक चलही “साइबर जागृति अभियान”
बल्लूराम डॉट काम
संपादक विजय धृतलहरे
कवर्धा दिनांक 14/08/2026
कबीरधाम म एसपी डॉ. जितेन्द्र कुमार यादव जारी करिन लिंक अउ क्यूआर कोड, खुद सेल्फी लेके करिन अभियान के शुरुआत
कबीरधाम। साइबर ठगी अउ ऑनलाइन अपराध के बढ़त खतरा ले आम जनता ला जागरूक अउ सुरक्षित करे बर छत्तीसगढ़ पुलिस ह 15 अगस्त ले 2 अक्टूबर 2026 तक “साइबर जागृति अभियान” चलाय के फैसला करे हे। सात हफ्ता तक चलइया ये अभियान के मुख्य उद्देश्य प्रदेश ला साइबर अपराध मुक्त बनाय बर जनभागीदारी बढ़ाना अउ हर वर्ग के मनखे ला साइबर सुरक्षा के प्रति जागरूक करना हे।
देश के आजादी के भावना ले प्रेरित ये अभियान के संदेश हे कि जइसने आजादी के लड़ई म करोड़ों देशवासी एकजुट होके लड़िन, वइसनेच साइबर अपराध के खिलाफ घलो सबो झन ला एकजुट होके लड़ना हे।
“साइबर जागृति के एक सेल्फी” बनही अभियान के पहचान
अभियान के खास आकर्षण “साइबर जागृति के एक सेल्फी” हे। छत्तीसगढ़ पुलिस अउ जिला पुलिस के सोशल मीडिया हेंडल्स म जारी लिंक ला क्लिक करके या क्यूआर कोड स्कैन करके लोगन साइबर जागरूकता संदेश वाले सेल्फी फ्रेम म अपन फोटो ले सकहीं। ये सेल्फी ला अपन सोशल मीडिया अकाउंट म शेयर करे ले साइबर अपराध के खिलाफ जागरूकता के संदेश हजारों-लाखों लोगन तक पहुंचही।
पुलिस के कहना हे कि सोशल मीडिया के माध्यम ले चलइया ये अभियान म आम जनता के भागीदारी सबसे जरूरी हे।
कबीरधाम म एसपी ह खुद सेल्फी लेके करिन अभियान के शुरुआत
कबीरधाम जिला म पुलिस अधीक्षक डॉ. जितेन्द्र कुमार यादव ह प्रेस वार्ता के दौरान “साइबर जागृति अभियान” के लिंक अउ क्यूआर कोड जारी करिन। एसपी ह खुद अपन मोबाइल ले क्यूआर कोड स्कैन करके सेल्फी फ्रेम म फोटो खिंचवाइन अउ सोशल मीडिया म शेयर करिन।
एसपी ह जिलावासियन, सामाजिक अउ व्यापारिक संगठन, संस्थान के पदाधिकारी, सोशल मीडिया इंफ्लुएंसर, प्रोफेशनल्स, कलाकार अउ गणमान्य नागरिक मन ला अभियान म बढ़-चढ़के हिस्सा लेय के अपील करिन।
उन्हीं कहिन कि साइबर अपराध के खिलाफ जागरूकता बढ़ाना अकेले पुलिस के जिम्मेदारी नइ हे, बल्कि समाज के हर एक नागरिक के सहयोग जरूरी हे।
सात हफ्ता, सात अलग-अलग विषय म जागरूकता अभियान
पहिली हफ्ता: स्कूल-कॉलेज म डिजिटल सतर्कता अउ बुनियादी साइबर सुरक्षा के जानकारी।
दूसरी हफ्ता: बैंक अउ वित्तीय संस्थान म वित्तीय ठगी अउ यूपीआई सुरक्षा के संबंध म जागरूकता।
तीसरी हफ्ता: वरिष्ठ नागरिक मन बर डिजिटल अरेस्ट अउ फर्जी कॉल के खिलाफ टाउन हॉल कार्यक्रम।
चौथी हफ्ता: महिला कॉलेज अउ सामुदायिक समूह म स्मार्टफोन प्राइवेसी अउ सुरक्षित ब्राउजिंग के जानकारी।
पांचवीं हफ्ता: रोजगार कार्यालय, आईटीआई अउ कौशल विकास केंद्र म युवामन ला जॉब फ्रॉड अउ फिशिंग के बारे म जागरूक करना।
छठवीं हफ्ता: डेटा प्राइवेसी अउ सोशल मीडिया के सुरक्षित इस्तेमाल के संबंध म अभियान।
सातवीं हफ्ता: ग्राम पंचायत अउ नगरीय निकाय म गांधी जयंती के अवसर पर “साइबर मुक्त छत्तीसगढ़” के संकल्प अभियान।
चौक-चौराहा ले सोशल मीडिया तक पहुंचही जागरूकता के संदेश
अभियान ला जन-जन तक पहुंचाय बर जिला पुलिस अउ स्थानीय थाना के टीम मन सार्वजनिक जगह, चौक-चौराहा, पार्क अउ बाजार म पोस्टर-बैनर के माध्यम ले क्यूआर कोड के प्रचार करहीं। साथे राज्य पुलिस अउ जिला पुलिस के सोशल मीडिया हेंडल्स अउ व्हाट्सएप ग्रुप के माध्यम ले घलो अभियान के लिंक साझा करे जाही।
2 अक्टूबर ला होही अभियान के समापन
सात हफ्ता तक चलइया “साइबर जागृति अभियान” के समापन 2 अक्टूबर 2026, गांधी जयंती के दिन होही। पुलिस के लक्ष्य हे कि जनभागीदारी के माध्यम ले साइबर अपराध के खिलाफ जागरूकता के एक मजबूत संदेश हर घर अउ हर गांव तक पहुंचाय जाए।
संदेश साफ हे—साइबर ठगी ले बचना हे त जागरूक रहव, सतर्क रहव अउ दूसर मन ला घलो जागरूक करव।
