बल्लूराम डॉट कॉम- विजय धृतलहरे
दिनांक- 04/05/2026/पंडरिया
सशासन तिहार 2026 के तहत पंडरिया विधानसभा के वनांचल इलाका म आज विकास अऊ जनसेवा के अनोखा तस्वीर देखे ला मिलिस, जब छत्तीसगढ़ के मुख्यमंत्री श्री विष्णु देव साय खुद गांव पहुंच के जनता संग सीधा संवाद करिन। ग्राम लोखान अऊ कमराखोल म मुख्यमंत्री जी के आगमन ले गांव-गांव म उत्साह अऊ उमंग के माहौल बन गीस।
कुई-कुकदुर हेलीपैड म मुख्यमंत्री जी के आगमन पर पंडरिया विधायक भावना बोहरा अऊ भाजपा के पदाधिकारी मन गरमजोशी ले स्वागत करिन। ए दौरान ग्राम लोखान म प्रधानमंत्री आवास योजना के हितग्राही मन ला गृह प्रवेश कराय गीस अऊ उनला बधाई अऊ शुभकामना दीस गीस।
मुख्यमंत्री श्री विष्णु देव साय गांव म बनत पंचायत भवन म पहुंच के खुद ईंट जोड़ाई करिन अऊ श्रमिक मन संग बैठके अंगाकर रोटी अऊ बोरे-बासी खाइन। मुख्यमंत्री के ए सादगी अऊ अपनापन ले गांव के लोगन म भारी खुशी देखे ला मिलिस।
एखर बाद ग्राम कमराखोल म आयोजित जन चौपाल म मुख्यमंत्री जी जनता संग सीधा संवाद करिन। गांव के लोगन अपन-अपन समस्या रखिन, जेन म से कई समस्या के मौके म ही निराकरण कर दीस गीस अऊ बाकी मांग मन ला जल्दी पूरा करे के भरोसा दे गीस।
कार्यक्रम के दौरान मुख्यमंत्री जी लखपति दीदी, स्व-सहायता समूह के बहिनी मन अऊ शासन के विभिन्न योजना के हितग्राही मन संग घलो मुलाकात करिन अऊ प्रधानमंत्री आवास योजना के तहत बनत घर मन के निरीक्षण करिन। मुख्यमंत्री ला अपन बीच म पाकर वनांचल अऊ आदिवासी परिवार मन म खास उत्साह अऊ भरोसा के माहौल दिखिस।
मुख्यमंत्री श्री विष्णु देव साय कहिन कि “सुशासन तिहार सरकार के जनकेन्द्रित सोच अऊ पारदर्शी कामकाज के जीता-जागता उदाहरण आय। एखर माध्यम ले शासन के योजना मन के लाभ आखिरी व्यक्ति तक पहुंचाय जात हवय।”
विधायक भावना बोहरा कहिन कि ए तिहार सिरिफ एक आयोजन नई, बल्कि जनता के भरोसा अऊ विकास के मजबूत आधार आय। सरकार खुद गांव-गांव पहुंच के समस्या सुनत हवय अऊ तुरते समाधान देत हवय, जेकर ले शासन म पारदर्शिता अऊ जवाबदेही बढ़त हवय।
पंडरिया विधानसभा के वनांचल इलाका म सड़क, पानी, बिजली, शिक्षा अऊ स्वास्थ्य जइसन बुनियादी सुविधा म तेजी ले विकास होवत हवय। पीएम जनमन योजना के तहत सड़क, पुल-पुलिया, हजारों आवास, जल योजना अऊ आंगनबाड़ी भवन जइसन कई विकास काम होय हवंय, जेन ले गांव के विकास ला नई दिशा मिलत हवय।
ए अवसर म भाजपा पदाधिकारी, जनप्रतिनिधि, अधिकारी-कर्मचारी अऊ भारी संख्या म ग्रामीण मन उपस्थित रहिन।
