कबीरधाम जिला के 64 प्राथमिक शिक्षक मन ला मिलिस प्रमोशन, बनिन प्रधान पाठक!
बल्लूराम डॉट कॉम
दिनांक 25/02/2026
विजय कुमार धृतलहरे
कवर्धा – शिक्षा विभाग मं लंबा बखत बाद कबीरधाम जिला के 64 शिक्षक मन प्रमोशन पाकर गदगद हो गे हवंय। शिक्षा संघ के प्रांतीय संस्थापक सदस्य सी.डी. भट्ट बताइन कि जिला शिक्षा अधिकारी एफ.आर. वर्मा आज प्रमोशन पाय 64 प्रधान पाठक मन के कौशलिंग बहुते पारदर्शी तरीका ले कराइन।
प्रमोशन बर छत्तीसगढ़ सहायक शिक्षक समग्र शिक्षक फेडरेशन के तरफ ले लगातार संघर्ष करे गीस, तब जाके 25 फरवरी ला द्वितीय प्रमोशन सूची जारी करे गीस। जिला ग्रंथालय भवन कबीरधाम मं, सब्बो खंड शिक्षा अधिकारी अउ जिला शिक्षा अधिकारी के उपस्थिति मं 64 सहायक शिक्षक मन के प्रमोशन उपरांत प्रधान पाठक पद बर कौशलिंग करके पदस्थापना करे गीस।
पूरा प्रक्रिया मं पारदर्शिता के पूरा ध्यान रखे गीस अउ नियम के सही पालन करे गीस। ए बर शिक्षा विभाग कबीरधाम ला प्रांतीय संस्थापक सी.डी. भट्ट धन्यवाद ज्ञापित करिन।
ए अवसर मं शिक्षक संघ के कार्यकारी अध्यक्ष महेश कुमार ठाकुर, जिला प्रवक्ता धरमदास साहू, शिक्षक नेता चंद्रप्रकाश घृतलहरे, उमराव सिंह डडसेना, कार्यवाहक ब्लॉक अध्यक्ष सुरेश ठाकुर, राजेश मिश्रा, लोकेंद्र चंद्रवंशी, धर्मू कुर्रे, गोपीदास मानिकपुरी सहित भारी संख्या मं शिक्षक मन बधाई देइन।
