मुख्यमंत्री बर नाम के ज्ञापन देके गरजे स्वास्थ्य कर्मचारी, निजीकरण बंद करे अऊ लंबित मांग पूरा करे के उठिस जोरदार मांग

बल्लूराम डॉट कॉम

विजय धृतलहरे

दिनांक 22/07/2026

कवर्धा। छत्तीसगढ़ प्रदेश स्वास्थ्य कर्मचारी संघ, जिला कबीरधाम के बैनर तले बुधवार के दिन स्वास्थ्य कर्मचारी मन अपन बरसों ले लंबित मांग मन ला लेके शहर मं जोरदार रैली निकालिन। हाथ मं बैनर अऊ तख्ती धरके कर्मचारी मन नारेबाजी करत कलेक्ट्रेट पहुंचिन अऊ कलेक्टर के माध्यम ले मुख्यमंत्री, स्वास्थ्य मंत्री अऊ स्वास्थ्य सचिव के नाम ज्ञापन सौंपके त्वरित कार्रवाई करे के मांग करिन।

संघ के जिला अध्यक्ष अशोक डहरिया कहिन कि स्वास्थ्य कर्मचारी मन के कई महत्वपूर्ण मांग बरसों ले शासन स्तर मं लंबित हवय, फेर अब तक कोनो ठोस फैसला नई होय हे। ज्ञापन मं पुनरीक्षित वेतनमान ला जल्दी लागू करे, स्वास्थ्य विभाग मं निजीकरण, ठेका प्रथा अऊ आउटसोर्सिंग बंद करे, खाली पद मन मं नियमित भर्ती करे अऊ सरकारी स्वास्थ्य सेवा ला मजबूत बनाय के मांग रखे गे।

जिला सचिव कृष्णकांत तिवारी बताइन कि प्रदेश के अस्पताल अऊ स्वास्थ्य संस्थान मन मं करीब 35 ले 40 प्रतिशत पद खाली हवंय। एकर से मरीज मन ला समय मं बेहतर इलाज अऊ सुविधा नई मिलत हे। एखर से खाली पद मन मं तुरंत सीधी भर्ती करे के जरूरत हवय।

जीवनदीप कर्मचारी संघ के जिला अध्यक्ष नारायण कांड्रा अऊ विकास कुर्रे कहिन कि संविदा अऊ दैनिक वेतनभोगी कर्मचारी मन बर समान काम के बदला समान वेतन देय जाय। लंबे समय ले सेवा देत संविदा कर्मचारी मन के नियमितीकरण करे जाय अऊ जीवनदीप समिति के कर्मचारी मन बर पूरा प्रदेश मं एक समान मानदेय तय करे जाय, ताकि जिला-दर-जिला वेतन मं भेदभाव नई होय।

ज्ञापन मं पदोन्नति, जोखिम भत्ता, रजिस्ट्रेशन भत्ता, आवास सुविधा सहित अउ घलो कई लंबित मांग मन के जिक्र करे गे। संघ के पदाधिकारी मन कहिन कि स्वास्थ्य विभाग मं बढ़त निजीकरण अऊ आउटसोर्सिंग ले कर्मचारी मन के भविष्य खतरा मं पड़त हवय अऊ सरकारी स्वास्थ्य सेवा के गुणवत्ता घलो प्रभावित होवत हे। एखर से सरकार ला सार्वजनिक स्वास्थ्य व्यवस्था ला मजबूत करे बर ठोस नीति बनाना चाही।

संघ के मांग हवय कि प्रदेश मं राज्य स्वास्थ्य आयोग के गठन करे जाय अऊ स्वास्थ्य क्षेत्र मं काम करत प्रशिक्षित युवा अऊ कर्मचारी मन के हित के सुरक्षा सुनिश्चित करे जाय।

रैली के दौरान स्वास्थ्य कर्मचारी मन शासन के खिलाफ जमके नारेबाजी करिन अऊ चेतावनी दिन कि अगर जल्द सकारात्मक फैसला नई होही, त आने वाला समय मं आंदोलन ला अउ तेज करे जाही, जेनकर पूरा जिम्मेदारी शासन-प्रशासन के रहिही।

ए अवसर मं उपाध्यक्ष प्रमोद गुप्ता, रामकुमार जांगड़े, अनिल चंद्रवंशी, एजाज खान, ज्ञानू मानिकपुरी, ईश्वर कुंभकार, गोपाल खरसोले, संजय साहू, अश्वनी निर्मलकर, संतोष छेदवी, त्रिवेणी कुर्रे, महेशिया भास्कर, महेंद्र चंद्रवंशी, छवि साहू, तन्मय साहू, तान्या देवांगन, कुसुमलता डहिरे, पूजा नेताम, नेहा गर्ग, सुनीता पटेल सहित बड़ी संख्या मं स्वास्थ्य कर्मचारी अऊ संघ के पदाधिकारी उपस्थित रहिन।