डंगनिया मं गरजिस मीटर रीडर मन : “स्मार्ट मीटर बंद करव, रोजगार बचाव” के गूंजिस आवाज

बल्लूराम डॉट कॉम

विजय धृतलहरे

रायपुर, 27 जुलाई 2026।
रायपुर के डंगनिया मं विद्युत मीटर रीडिंग श्रमिक संघ के बैनर तले आयोजित एक दिवसीय धरना-प्रदर्शन मं छत्तीसगढ़ भर ले पहुंचे हजारों मीटर रीडर मन अपन जायज मांग ला लेके जोरदार प्रदर्शन करिन। कार्यक्रम मं छत्तीसगढ़ के पूर्व मुख्यमंत्री अउ एआईसीसी के राष्ट्रीय महासचिव भूपेश बघेल मुख्य अतिथि के रूप मं शामिल होइस। संघ के संरक्षक सुशील सन्नी अग्रवाल घलो मंच मं मौजूद रहिन।

धरना मं स्मार्ट मीटर योजना ला लेके गंभीर सवाल उठाए गिस। प्रदर्शनकारी मन के कहना रहिस कि जिहां पहिली उपभोक्ता मन के बिजली बिल ₹300–₹400 आवत रहिस, ओही जगा अब कई झन के ₹5 हजार ले ₹10 हजार तक बिल आथे। प्रदर्शनकारी मन सरकार ले स्मार्ट मीटर योजना ऊपर साफ, पारदर्शी अउ तथ्यात्मक जवाब मांगे हवंय।

संघ के पदाधिकारी मन के कहना रहिस कि स्मार्ट मीटर के चलते हजारों मीटर रीडर मन के रोजगार खतरा मं पड़त हे। एखर सेती सरकार पहिली रोजगार के सुरक्षा अउ वैकल्पिक व्यवस्था करे, ओकर बादच कोनो नई व्यवस्था लागू करे।

मीटर रीडर संघ के प्रमुख मांग

स्मार्ट मीटर योजना ला तत्काल बंद करे जाव।

प्रीपेड स्मार्ट मीटर लागू करे ले पहिली सबो मीटर रीडर मन बर वैकल्पिक रोजगार अउ समायोजन के नीति बनाय जाव।

रोजगार संरक्षण अउ पुनर्वास के ठोस व्यवस्था होय ले पहिली प्रीपेड व्यवस्था लागू नई करे जाव।

करीब 5 हजार मीटर रीडर मन के प्रतिनिधिमंडल संग सरकार जल्द बैठक करके स्थायी समाधान निकाले।

कार्यक्रम मं रायपुर पश्चिम के पूर्व विधायक विकास उपाध्याय, संघ के अध्यक्ष संतोष यादव, उपाध्यक्ष अशोक कुमार साहू, पूर्व महापौर प्रमोद दुबे सहित कई वरिष्ठ नेता अउ भारी संख्या मं श्रमिक साथी उपस्थित रहिन।

धरना मं वक्ता मन कहिन कि श्रमिक अधिकार, रोजगार के सुरक्षा अउ जनता के हित बर लड़ई लगातार जारी रही, अउ सरकार ला श्रमिक मन के आवाज सुनके उचित निर्णय लेय बर आग्रह करे गिस।