गुरु बालकदास शहादत दिवस मं कबीरधाम जिला सतनामी समाज के बड़ा फैसला – 21 बिंदु के समाजिक नियमावली जारी, समाज ला अपनाय बर अपील
बल्लूराम डॉट कॉम-: विजय धृतलहरे
कबीरधाम, 28 मार्च 2026
महान संत गुरु घासीदास जी के सुपुत्र, वीर बलिदानी गुरु बालकदास जी के 166वां शहादत दिवस के अवसर मं कबीरधाम जिला सतनामी समाज अऊ सावित्री फुलों देवी महिला समिति के तत्वाधान मं गुरुद्वारा कवर्धा मं श्रद्धा अऊ सम्मान के संग कार्यक्रम मनाय गिस।
कार्यक्रम मं समाज के लोगन मन गुरु बालकदास जी ला श्रद्धांजलि अर्पित करिन अऊ उनकर महान कार्य मन ला याद करिन। गुरु बालकदास जी अंग्रेजी हुकूमत के खिलाफ लड़ई लड़े रहिन, समाज मं फैले भेदभाव ला खत्म करे, धर्म परिवर्तन अऊ गौ हत्या के विरोध करे, अऊ महिला मन के अधिकार बर आवाज उठाय रहिन। विधवा विवाह ला बढ़ावा देके समाज मं नवा सोच लाय के काम करिन।
बताय जाथे के गुरु बालकदास जी सतनाम सेना के स्थापना करके गांव-गांव मं रावटी लगा के समाज ला एकजुट करे के काम करत रहिन। उनकर बढ़त प्रभाव ला देख के सामंतवादी ताकत अऊ अंग्रेज मिलके साजिश रचिन अऊ 16 मार्च 1860 ला मुंगेली लगे औराबांधा गांव मं उनकर ऊपर हमला करवाय गिस। हमला मं उनकर अंगरक्षक सरहा जोधाई वीरगति पाइन अऊ गुरु जी घलो गंभीर रूप ले घायल होगे रहिन। इलाज के दौरान 28 मार्च 1860 ला वो मन अमर हो गिन।
⚖️ समाज मं सुधार बर 21 बिंदु के नियमावली जारी
शहादत दिवस के अवसर मं जिला सतनामी समाज संगठन समाज मं आइस कुछ बुराई ला दूर करे बर 21 बिंदु के नियम जारी करिस अऊ सबो समाज ला एला पालन करे बर अपील करिस।
मुख्य बिंदु मन ये हवंय👇
▪️ हर गांव मं 7 सदस्यीय कमेटी बनाय जाही
▪️ शराब अऊ नशा ऊपर पूरा प्रतिबंध
▪️ सात्विक शाकाहारी जीवन अपनाय जाही
▪️ मृत्यु भोज (दशगात्र) बंद, साधारण दाल-भात के व्यवस्था
▪️ कफन कपड़ा प्रथा बंद, जरूरतमंद परिवार ला आर्थिक मदद
▪️ शादी-ब्याह मं दहेज अऊ फिजूल खर्चा बंद
▪️ DJ-धुमाल, जूता चोरी जइसन परंपरा ऊपर रोक
▪️ गांव के छोटे-मोटे विवाद गांव मं निपटाय जाही
▪️ शिक्षा, खेती अऊ व्यापार मं विशेष ध्यान
▪️ जैतखाम गाड़े बर संगठन के अनुमति जरूरी
अइसने कुल 21 नियम बनाके समाज मं एकर पालन करे के संकल्प ले गिस।
पढहई बन पर दान
सावित्री फुलों देवी महिला समिति द्वारा 40 हजार रुपए के पढहई करईया छात्र मन ल दान दे गीस दान दाता सोनम बंजारे व साथी मन मिल के करीस
👥 बड़ी संख्या मं समाज के उपस्थिति
कार्यक्रम मं जिला अध्यक्ष रामप्रसाद मिरी, संरक्षक विजय धृतलहरे, जयप्रकाश बंजारे, मनोज बंजारे, भरत बर्मन, राजेन्द्र टंडन, शिवप्रसाद जांगड़े सोनम बंजारे अरविंद पात्रे अगरमन,संतोष भारती, श्याम टंडन, रामबिलास मिरी, वीर,कमल बंजारे,सहित भारी संख्या मं सतनामी समाज के लोगन मन उपस्थित रहिन।
🙏 अपील
समाज के प्रमुख मन कहिन के गुरु बालकदास जी के बताय रद्दा मं चलके समाज ला एकजुट अऊ सशक्त बनाय के जरूरत हवय। ये 21 बिंदु के नियम समाज सुधार के दिशा मं एक ठोस कदम आय।
