बल्लूराम डॉट कॉम
संपादक- विजय कुमार धृतलहरे
- कवर्धा, 16 मार्च। कबीरधाम पुलिस ह करीब 56 दिन के गहन जांच के बाद चर्चित सत्यमदास मानिकपुरी हत्याकांड के खुलासा कर डारे हे। ए मामला म एक विधि से संघर्षरत नाबालिग बालक ला पुलिस अभिरक्षा म लेहे गे हे।
जानकारी मुताबिक 17 जनवरी 2026 ला थाना कवर्धा क्षेत्र के लालपुर नर्सरी के पाछू सड़क म एक युवक के लाश मिलिस। जांच म मृतक के पहचान घोठिया रोड कवर्धा निवासी 27 वर्षीय सत्यमदास मानिकपुरी के रूप म होइस, जऊन पेशा से डांस शिक्षक रहिस।
मामला के गंभीरता ला देखत पुलिस ह अलग-अलग टीम बनाके जांच सुरू करिस। जांच के दौरान लगभग 50 हजार मोबाइल नंबर के कॉल डाटा के विश्लेषण करे गीस अउ 500 ले जियादा सीसीटीवी कैमरा के फुटेज के बारीकी ले जांच करे गीस। ए दौरान 100 ले जियादा लोगन ले पूछताछ घलो करे गीस।
जांच म सामने आइस कि मृतक ह नाबालिग ला अप्राकृतिक संबंध बनाय बर ब्लैकमेल करत रहिस। ए बात ले तंग आके नाबालिग ह घटना के दिन व्हाट्सएप कॉल करके मृतक ला लालपुर नर्सरी के लगे बुलाइस अउ चाकू ले गला म वार करके ओकर हत्या कर दीस।
घटना के बाद आरोपी ह मृतक के मोबाइल अउ सिम कार्ड ला नदी म फेंक दीस। पुलिस आरोपी के निशानदेही म मोबाइल बरामद कर लेहे हे, जबकि सिम कार्ड के तलाश जारी हे। घटना म उपयोग करे चाकू, स्कूटी अउ खून लगे कपड़ा घलो जप्त कर ले गीस।
फिलहाल पुलिस ह नाबालिग आरोपी ला अभिरक्षा म लेके आगे के वैधानिक कार्रवाई करत हे।
