गली पारा के जांच दउरान महापौर मधुसूदन यादव चिखली मं सर्व समाज मांगलिक भवन अऊ रमन बाजार के करिन निरीक्षण
बल्लूराम डॉट कॉम
विजय कुमार धृतलहरे
कहिन – मांगलिक भवन के मरम्मत होही अऊ रानी अवंती बाई प्रतिमा स्थल के नवा सिरे ले संधारण करे जाही
राजनांदगांव, 23 फरवरी। महापौर श्री मधुसूदन यादव आज सुबेरे निगम के तकनीकी अऊ स्वास्थ्य अमला संग चिखली इलाका मं पैदल घूम-घूम के साफ-सफाई के जायजा लिन अऊ सर्व समाज मांगलिक भवन अऊ रमन बाजार के निरीक्षण करिन। एही कड़ी मं ओव्हर ब्रिज लगे बने रानी अवंती बाई के प्रतिमा स्थल के घलो देखिन अऊ प्रतिमा संग आसपास के जगह के नवा सिरे ले संधारण करे बर चर्चा करिन।
ए दौरान निगम अध्यक्ष श्री टोपेन्द्र सिंह पारस वर्मा, जल विभाग प्रभारी सदस्य श्री सुनील साहू, लोककर्म विभाग प्रभारी सदस्य श्री सावन वर्मा, वरिष्ठ पार्षद श्री शिव वर्मा अऊ वार्ड पार्षद श्रीमती श्रुति लोकेश जैन मौजूद रहिन।
चिखली निरीक्षण के बखत महापौर श्री यादव स्वास्थ्य अमला ला कहिन कि पूरा इलाका मं साफ-सफाई के खास ध्यान रखे जावय। नाली सफाई के बाद निकले कचरा ला ओही दिन उठाय जावय। लोगन ला समझाय जावय कि कचरा नाली मं झन डारंय, गीला अऊ सुखा कचरा घर मं अलग-अलग रखके स्वच्छता दीदी मन ला देवयं। आवत स्वच्छता सर्वेक्षण ला देखत वार्डवासी मन संग चर्चा कर फीडबैक घलो लेवंय।
चिखली शासकीय प्रेस के पाछू बने सर्व समाज मांगलिक भवन ला देखके महापौर कहिन कि भवन जुन्ना होगे हवय, एसेकर मरम्मत जरूरी हवय। ए भवन मं अलग-अलग आयोजन होवत रहिथे, तेखर सेती रंग-रोगन कराय जावय, शौचालय के घलो मरम्मत होवय अऊ भवन आसपास पौधरोपण करे जावय।
रमन बाजार के निरीक्षण करत महापौर कहिन कि बाजार आसपास के अतिक्रमण हटाय जावय अऊ साफ-सफाई बनाय रखे जावय। रमन बाजार लगे बने भवन के घलो जायजा लिन अऊ डबरी तलाब मं टो वाल बनाय अऊ सड़क मरम्मत कर आसपास के जगह ला व्यवस्थित करे बर कहिन।
महापौर श्री यादव चिखली ओव्हर ब्रिज लगे बने रानी अवंती बाई प्रतिमा स्थल के घलो निरीक्षण करिन। ओमन कहिन कि ए स्थल मं घलो मरम्मत अऊ संधारण के जरूरत हवय। प्रतिमा स्थल के बढ़िया साफ-सफाई, पेडेस्टल मरम्मत, पेवर ब्लाक लगाय, जाली अऊ दीवार मं रंग-रोगन करे अऊ प्रतिमा मं पेंट कराय बर अधिकारी मन ला निर्देश दीन। संगही स्थल मं पौधा लगाय अऊ पर्याप्त उजाला के व्यवस्था करे बर कहिन।
निरीक्षण के बखत प्र. सहायक अभियंता सुश्री सुषमा साहू, उप अभियंता श्री अनुप पांडे, श्री मोनेन्द्र साठिया अऊ श्रीमती रोमाली शेण्डे, प्र. स्वास्थ्य अधिकारी श्री राजेश मिश्रा, प्र. स्वच्छता निरीक्षक श्री पवन कुर्रे, सह. उद्यान प्रभारी श्री दिलीप गिरी गोस्वामी अऊ समयपाल श्री चिराग मेश्राम उपस्थित रहिन।
