रायपुर – दिनांक 21/02/2026
बल्लूराम डॉट कॉम
विजय कुमार धृतलहरे
रायपुर –: छत्तीसगढ़ प्रगतिशील सतनामी समाज के अध्यक्ष श्री लखनलाल कोसले ह रायपुर प्रेस क्लब मं प्रेस कांफ्रेंस करके मांग करे हें कि छत्तीसगढ़ राज कोटा मं 2 पद राज्य सभा सांसद बर चुनाव के नोटिफिकेशन जारी हो गे हवय। एखर सेती छत्तीसगढ़ मं सतनामी समाज के जनसंख्या के अनुपात ला देखत कम से कम 1 सीट मं सतनामी समाज के प्रतिनिधि ला राज्य सभा सदस्य बनाय जाय।
ए मांग ला लेके बीते दिन प्रगतिशील सतनामी समाज के प्रदेश अध्यक्ष के अगुवाई मं संगठन के जम्मो पदाधिकारी मन रायपुर प्रेस क्लब मं कांफ्रेंस करके कांग्रेस अऊ भाजपा दुनो दल के प्रदेश अध्यक्ष, राष्ट्रीय अध्यक्ष अऊ छत्तीसगढ़ के मुख्यमंत्री के नाम पत्र लिखके मांग करे हें।
ओमन कहिन कि पहिले भाजपा के रमन सिंह सरकार के समय सतनामी समाज ला एक सीट राज्य सभा मं अवसर मिलत रहिस। बाद मं जब कांग्रेस सरकार रहिस, तभो सतनामी समाज के तरफ ले मांग करे गे रहिस। राहुल गांधी जब गिरौदपुरी आय रहिन, तभो मांग पत्र सौंपे गे रहिस।
ओमन ये घलो बताइन कि छत्तीसगढ़ मं पहिले 2 सीट आरक्षित रहिस, त दू सांसद लोक सभा मं जावत रहिन। फेर बिलासपुर लोक सभा सीट सामान्य होगे के बाद अब सिरिफ एके सीट अनुसूचित जाति बर बच गे हवय। ए सब के बावजूद कांग्रेस सतनामी समाज ला राज्य सभा टिकट नई दीस, बल्कि दूसर राज्य के प्रत्याशी ला जिताके भेज दीस, जेन 6 साल तक छत्तीसगढ़ के उपेक्षा करिस। बाद मं विधानसभा चुनाव मं कांग्रेस ला हार के सामना करना परिस।अब जब राज्य सभा के 2 सीट बर चुनाव होवत हवय, त सतनामी समाज कांग्रेस अऊ भाजपा दुनो दल ला पत्र लिखके मांग करे हवय कि अपन-अपन दल ले सतनामी समाज के कोनो योग्य व्यक्ति ला राज्य सभा बर टिकट देके जिताय जाय।
