एक थाना–एक हफ्ता” : अब थाना मं बैठही पुलिस कप्तान, जनता के समस्या के होही सीधे सुनवाई

“एक थाना–एक हफ्ता” : अब थाना मं बैठही पुलिस कप्तान, जनता के समस्या के होही सीधे सुनवाई

सहसपुर लोहारा थाना ले शुरू होइस अभिनव पहल, हर हफ्ता अलग थाना मं पहुंचही एसपी जितेन्द्र यादव

कबीरधाम। कबीरधाम जिला के पुलिसिंग ला अउ जादा जनसुलभ, संवेदनशील अउ जवाबदेह बनाय बर पुलिस अधीक्षक जितेन्द्र कुमार यादव (IPS) के अगुवाई मं “एक थाना–एक सप्ताह” नाम के अभिनव पहल के शुरुआत होइस। अब हर हफ्ता जिला के एक थाना एक दिन बर पुलिस अधीक्षक कार्यालय के रूप मं संचालित होही।

03 सितंबर ले शुरू होइस ए पहल के तहत एसपी खुद थाना मं दिनभर मौजूद रहिहीं अउ आम जनता, जनप्रतिनिधि, ग्रामीण अउ नागरिक मन ले सीधे भेंट-मुलाकात कर समस्या अउ शिकायत सुनिहीं। ए व्यवस्था ले लोगन ला अपन समस्या लेके जिला मुख्यालय जाय के जरूरत कम पड़ही अउ थाना स्तर मं ही वरिष्ठ पुलिस अधिकारी तक अपन बात पहुंचा सकहीं।

थाना मं होही सीधे जनसुनवाई

एसपी थाना क्षेत्र के नागरिक मन ले सीधे संवाद कर के शिकायत, अपराध, पुलिस कार्रवाई अउ कानून-व्यवस्था संबंधी मामला के जानकारी लेहीं। शिकायत मन ऊपर संबंधित अधिकारी मन ला समय-सीमा मं नियमानुसार कार्रवाई करे के निर्देश देय जाही।

इलाका के कानून-व्यवस्था अउ अपराध के होही समीक्षा

“एक थाना–एक सप्ताह” के दौरान संबंधित थाना क्षेत्र के अपराध स्थिति, लंबित मामला, वारंटी मन के तामिली, प्रतिबंधात्मक कार्रवाई अउ संवेदनशील क्षेत्र के समीक्षा होही। अपराध नियंत्रण अउ शांति-सुरक्षा व्यवस्था ला मजबूत करे बर जरूरी दिशा-निर्देश भी देय जाही।

जनप्रतिनिधि अउ आम जनता संग सीधे संवाद

पुलिस कप्तान स्थानीय जनप्रतिनिधि, ग्राम प्रमुख, गणमान्य नागरिक अउ आम जनता संग चर्चा कर के क्षेत्र के जमीनी समस्या अउ कानून-व्यवस्था के स्थिति के जानकारी लेहीं। ए ले पुलिस ला स्थानीय स्तर के समस्या समझे अउ बेहतर पुलिसिंग के योजना बनाय मं मदद मिलही।

पुलिस जवान मन के समस्या के घलो होही समाधान

ए पहल सिर्फ आम जनता तक सीमित नइ रहिही। थाना मं पदस्थ पुलिस अधिकारी-कर्मचारी मन के विभागीय अउ कार्य संबंधी समस्या के घलो एसपी सीधे सुनिहीं। पुलिस कर्मी मन के बेहतर कार्य वातावरण अउ मनोबल ला प्रभावी पुलिसिंग के जरूरी हिस्सा बतावत हुए, एसपी नियमानुसार समस्या के निराकरण बर जरूरी निर्देश देहीं।

सहसपुर लोहारा ले शुरुआत, अगला पड़ाव कुंडा

पुलिस अधीक्षक जितेन्द्र कुमार यादव 03 सितंबर ला थाना सहसपुर लोहारा पहुंच के “एक थाना–एक सप्ताह” पहल के शुरुआत करिन। इहां उन्होंनें जनप्रतिनिधि, ग्रामीण अउ आम नागरिक मन संग सीधे संवाद कर के समस्या अउ सुझाव सुनिन। साथे थाना क्षेत्र के कानून-व्यवस्था अउ पुलिसिंग के समीक्षा कर संबंधित अधिकारी मन ला जरूरी निर्देश देिन।

अब अगला सप्ताह थाना कुंडा मं पुलिस कप्तान खुद मौजूद रहिहीं। हर सप्ताह अलग-अलग थाना मं पहुंच के एसपी जनसुनवाई, पुलिसिंग समीक्षा अउ पुलिस कर्मी मन के समस्या के समाधान करिहीं।

“पुलिस जनता के बीच, जनता पुलिस के करीब”

कबीरधाम पुलिस के ये पहल के मुख्य भावना यही हे कि पुलिस जनता के बीच पहुंचय अउ जनता ला वरिष्ठ पुलिस अधिकारी तक सीधे पहुंच मिले। “एक थाना–एक सप्ताह” ले थाना स्तर के समस्या के जल्दी समाधान, अपराध नियंत्रण, कानून-व्यवस्था के निगरानी अउ पुलिस-जन संवाद ला मजबूती मिले के उम्मीद हे।