बल्लूराम डॉट कॉम
विजय धृतलहरे 01/06/2026
कवर्धा। जनगणना 2027 के तहत कबीरधाम जिला म पहिली चरण के काम सफलतापूर्वक पूरा होगे हवय। 1 मई ले 30 मई 2026 तक चले मकान सूचीकरण अऊ मकान गणना के काम ला जिला भर म पूरा कर ले गे हवय। ए राष्ट्रीय अभियान म 1806 अधिकारी-कर्मचारी के टीम घर-घर पहुंचके जानकारी जुटाइस।
जिला म 07 नगरीय निकाय अऊ 08 तहसील के 1017 गांव म मकान सूचीकरण के काम संपन्न होइस। ए दौरान 1778 गणना ब्लॉक बनाय गे रहिस अऊ प्रगणक मन मोबाइल एप के माध्यम ले घर-घर जाके परिवार मन ले जानकारी संकलित करिन।
कलेक्टर अऊ प्रमुख जनगणना अधिकारी श्री गोपाल वर्मा कहिन कि जनगणना सिरिफ आंकड़ा जुटाय के काम नइये, बल्कि ए भविष्य के विकास बर मजबूत आधार तैयार करथे। ओमन जिला वासियन मन के सहयोग बर आभार जताइन अऊ कहिन कि जनता के सहयोग ले पूरा जिला म शांतिपूर्वक अऊ सफल ढंग ले काम पूरा होइस।
जनगणना के पहिली चरण म मकान, परिवार के सुविधा अऊ परिसंपत्ति से जुड़े 33 प्रकार के जानकारी जुटाय गे हवय, जेन ला भारत सरकार के सर्वर म सुरक्षित रखे गे हवय। प्रशासन के मुताबिक नागरिक मन ले मिले जानकारी जनगणना अधिनियम 1948 अऊ नियमावली 1990 के तहत पूरी तरह गोपनीय रहिही।
फरवरी 2027 म होही दूसर चरण
जनगणना 2027 के दूसर चरण, मतलब जनसंख्या गणना के काम फरवरी 2027 म कराय जाही। पहिली चरण म बने मकान सूचीकरण के आधार म दूसर चरण म जनसंख्या गणना के काम होही, ताकि कोनो घर अऊ परिवार गणना ले छुटे नइ।
जिला प्रशासन उम्मीद जताइस कि जइसने सहयोग पहिली चरण म मिलिस, वइसनेच सहयोग दूसर चरण म घलो मिलही।
