बल्लूराम डॉट कॉम
विजय कुमार धृतलहरे
कवर्धा, 28 फरवरी 2026।
कलेक्टर गोपाल वर्मा जिला स्तरीय परामर्शदात्री समिति (DLCC) अऊ जिला स्तरीय समीक्षा समिति के तिमाही बैठक मं जिला के सबो बैंक अधिकारी मन ला शासन के योजना अंतर्गत आवत ऋण आवेदन मन ऊपर बिना देरी तुरते कार्रवाई करे के निर्देश दिहिन।
जिला पंचायत के सभाकक्ष मं होय बैठक मं कलेक्टर कहिन कि अलग-अलग विभाग के माध्यम ले हितग्राही मन ला सब्सिडी अऊ ऋण दिलाय बर आवेदन बैंक मं भेजे जाथे, एसे मं कोनो भी आवेदन ला लंबित नई रखे जाय। जऊन आवेदन मं कागज-पत्र के कमी होही या कोनो दिक्कत होही, त संबंधित हितग्राही या विभाग ला तुरते बताय जाय, ताकि कमी ला जल्दी पूरा करके योजना के लाभ समय मं मिल सके।
वित्तीय वर्ष खतम होए के पहिली सब आवेदन निपटावव
कलेक्टर वर्मा कहिन कि वित्तीय वर्ष खतम होए के पहिली बैंक मं लंबित सबो ऋण आवेदन मन के निराकरण कर लेवव। कोनो पात्र हितग्राही के आवेदन ला बेवजह लंबित रखे जाना गंभीर लापरवाही मान जाही।
बैठक मं विभाग ले भेजे गे हितग्राही मूलक आवेदन मन ऊपर धीमी कार्रवाई अऊ साफ कारण नई बताय जाए ऊपर कलेक्टर नाराजगी जताइन। ओमन लीड बैंक मैनेजर श्री सुधीर बट्टा ला निर्देश दिहिन कि सबो बैंक अधिकारी मन के अलग बैठक लेकर लंबित प्रकरण मन के समीक्षा करंय अऊ 15 दिन के भीतर पालन प्रतिवेदन जमा करंय।
बिना अनुमति अनुपस्थित अधिकारी मन ला शो-कॉज नोटिस
बैठक मं बिना अनुमति गैरहाजिर रहे बैंक अधिकारी मन ऊपर कलेक्टर कड़ा नाराजगी जताइन अऊ शो-कॉज नोटिस जारी करे के निर्देश दिहिन। ओमन साफ कहिन कि बैठक मं अनुपस्थिति अऊ लापरवाही कत्तई बर्दाश्त नई होही।
कलेक्टर प्रधानमंत्री मुद्रा योजना, ग्रामीण आजीविका मिशन, प्रधानमंत्री रोजगार सृजन कार्यक्रम, प्रधानमंत्री जीवन ज्योति बीमा योजना अऊ प्रधानमंत्री सुरक्षा बीमा योजना सहित दूसर योजना मन के प्रगति के घलो समीक्षा करिन अऊ लक्ष्य के अनुसार काम तेज करे के निर्देश दिहिन।
