कवर्धा – विजय धृतलहरे 21/02/2026
बल्लूराम डॉट कॉम
कवर्धा म सतनामी समाज के मरघटिया के जगा ला लेके बरसों ले समस्या चलत रहिस। समाज के लोगन मन ए परेशानी ले छुटकारा पाय बर शासन-प्रशासन ला कई बेर आवेदन-निवेदन करिन, फेर कोनो ठोस व्यवस्था नई होइस। एही से समाज ला भारी दिक्कत के सामना करना पड़त रहिस।
सतनामी समाज के जिला अध्यक्ष रामप्रसाद मिरी बताइन कि जब कोनो समाज के व्यक्ति के देहांत होथे, त अभी के मुक्ति धाम म लाश दफनाय बर गड्ढा खोदत हन, त पुराना नरकंकाल निकल आथे। एखर से पहिली दफनाए गे परिवार मन ला दुख पहुंचथे अऊ शोकाकुल परिवार मन घलो पीरा सहना पड़थे। काबर कि मुक्ति धाम के लगभग जम्मो जगा म पहिलेच दफन हो चुके हे।
ए समस्या के समाधान बर समाज द्वारा कई बेर शासन-प्रशासन ले गुहार लगाय गे, फेर उचित ध्यान नई दे गे। एही से सतनामी समाज मन 2002 म चिन्हारी करे गे मरघटिया जमीन म बोर्ड लगा के आधिकारिक रूप ले चिन्हारी करिन।
ए काम के अगुवाई जिला अध्यक्ष रामप्रसाद मिरी, पार्षद भीखम कोसले, छाया पार्षद संतोष भारती, बसपा नेता शशि बंजारे सहित बड़ संख्या म कवर्धा के सतनामी समाज के युवा मन मौजूद रहिन।
