बल्लूराम डॉट कॉम
विजय धृतलहरे
बस्तर/कवर्धा, 15 अगस्त 2026। स्वतंत्रता दिवस के पावन अवसर म छत्तीसगढ़ के उप मुख्यमंत्री अउ गृह मंत्री श्री विजय शर्मा झीरम घाटी पहुंचिन अउ झीरम के शहीद मन ला श्रद्धांजलि अर्पित करिन। शहीद मन के बलिदान ला नमन करत हुए, शहीद मन के सुरता म पौधा लगाइन अउ श्रद्धा के संग उनकर बलिदान ला याद करिन।
उप मुख्यमंत्री श्री शर्मा कहिन कि झीरम के घटना छत्तीसगढ़ बर एक भयंकर विभीषिका रहिस। ए घटना म प्रदेश के वरिष्ठ नेता, जनप्रतिनिधि, सुरक्षा जवान अउ नागरिक मन के बलिदान ला छत्तीसगढ़ कभू नइ भुला सकय। विद्याचरण शुक्ल, नंदकुमार पटेल, महेंद्र कर्मा सहित अनेक वीर मन के बलिदान प्रदेश के इतिहास म हमेशा याद रखे जाही।
बस्तर अब आजादी के हवा म लेवत हे सांस
श्री शर्मा कहिन कि जे ताकत बस्तर ला सालों तक डर अउ हिंसा के साया म रखे रहिस, लोकतंत्र अउ संविधान के पहुंच ला रोके रहिस, आज ओ ताकत कमजोर हो चुके हे। बस्तर अब शांति, विकास अउ विश्वास के राह म तेजी ले आगू बढ़त हे।
उप मुख्यमंत्री कहिन कि तीन दिन के बस्तर तिरंगा यात्रा म पांच जिला म करीब 600 किलोमीटर के सफर तय करके शांति अउ एकता के संदेश देय गे। स्वतंत्रता दिवस के पहिली कर्रेगुट्टा के पहाड़ी म तिरंगा फहराके देश ला संदेश देय गे कि भारत के संविधान अब देश के हर कोना म मजबूती ले लागू होही।
शहीद परिवार मन ले भेंट, सम्मान के संग सुने मन के बात
झीरम पहुंचके उप मुख्यमंत्री श्री शर्मा शहीद मन के परिवारजन मन ले भेंट-मुलाकात करिन अउ उनला सम्मानित करिन। परिवारजन मन ले कहिन कि शासन के ओर ले शहीद मन के सम्मान म स्मारक निर्माण के काम ला आगे बढ़ाय जा रहे हे। ए दौरान शहीद परिवारजन मन झीरम के पवित्र माटी पुलिस अधीक्षक ला संग्रहित करे बर सौंपिन।
गोलियों ले नइ, हिम्मत अउ भरोसा ले जीतबो बस्तर
उप मुख्यमंत्री कहिन कि अब बस्तर ला रोकइया कोनो नइ हे। बस्तर के युवा मन ला हिंसा के राह म धकेले वाली ताकत मन कमजोर हो चुके हें। सरकार ह बस्तर ला सिरिफ गोली-बंदूक ले नइ, बल्कि हिम्मत, भरोसा अउ विकास के संकल्प ले जीतत हे।
उन्होंन बताइस कि हिंसा के राह छोड़के समाज के मुख्यधारा म लौटे बर लगातार प्रयास करे जा रहे हे, जेनकर परिणामस्वरूप 3 हजार ले जियादा लोग पुनर्वास के राह चुनके हिंसा छोड़ चुके हें। ये बदलाव बस्तर म शांति अउ विश्वास के नवा बिहान के संकेत हे।
ए अवसर म क्षेत्रीय विधायक श्री विनायक गोयल, महापौर जगदलपुर श्री संजय पांडे सहित जनप्रतिनिधि, कमिश्नर बस्तर श्री डोमन सिंह, आईजी श्री बीएन मीणा, कलेक्टर श्री आकाश छिकारा, पुलिस अधीक्षक श्री शलभ सिन्हा अउ अधिकारी-कर्मचारी मौजूद रहिन।
