बल्लूराम डॉट कॉम
विजय धृतलहरे
कवर्धा, 21 जून 2026। भोरमदेव सहकारी शक्कर कारखाना ह देश भर मंय किसान मन ल समय मंय भुगतान करे के मामला मंय नया कीर्तिमान रच दिस हे। लगातार दूसर बछर कारखाना ह गन्ना किसान मन ल एफआरपी (उचित एवं लाभकारी मूल्य) अउ अतिरिक्त रिकवरी राशि के शत-प्रतिशत भुगतान जून महिना मंयच पूरा कर दिस हे। उप मुख्यमंत्री विजय शर्मा के मौजूदगी मंय आज किसान मन के खाता मंय 29.83 करोड़ रुपिया सीधे अंतरित करे गीस।
उप मुख्यमंत्री श्री शर्मा कहिन कि भोरमदेव शक्कर कारखाना कोनो एक झिन व्यक्ति के नइ, बल्कि किसान मन के अपन कारखाना आय। किसान मन के भरोसा अउ सहकारिता के ताकत लेच आज कारखाना ह देश मंय अलग पहचान बनाय हे। ओमन कहिन कि किसान मन के सहयोग ले कारखाना लगातार बढ़त हे अउ समय मंय भुगतान करे के परंपरा बनावत हे।
आज 6.91 करोड़ रुपिया एफआरपी के बाकी रकम अउ 22.92 करोड़ रुपिया अतिरिक्त रिकवरी राशि के भुगतान करे गीस। एखर संग सत्र 2025-26 मंय किसान मन ल कुल 107.10 करोड़ रुपिया के भुगतान हो चुके हे, जेमां 84.18 करोड़ एफआरपी अउ 22.92 करोड़ अतिरिक्त रिकवरी राशि सामिल हे।
उप मुख्यमंत्री श्री शर्मा किसान मन ल जियादा ले जियादा गन्ना कारखाना तक लाय बर अपील करत कहिन कि बीते बछर 6 हजार ले जियादा किसान कारखाना संग जुड़िन रहिन। अब लक्ष्य 10 हजार किसान मन तक पहुँचाय के हे। ओमन 4 लाख मीट्रिक टन ले जियादा गन्ना क्रशिंग के लक्ष्य पूरा करे बर किसान मन ल प्रेरित करिन।
कार्यक्रम मंय किसान कल्याण परिषद अध्यक्ष सुरेश चंद्रवंशी, जिला पंचायत अध्यक्ष ईश्वरी साहू, नगर पालिका अध्यक्ष चन्द्र प्रकाश चंद्रवंशी सहित अनेक जनप्रतिनिधि अउ किसान बड़ी संख्या मंय उपस्थित रहिन।
दू बछर मंय भोरमदेव कारखाना के बड़े उपलब्धि
लगातार तीरसरा बछर 12 प्रतिशत ले जियादा शुगर रिकवरी।
किसान मन ल रियायती दर मंय चीनी वितरण।
बलराम सदन” कृषक प्रतीक्षालय के निर्माण।
मिट्टी परीक्षण सुविधा के उपलब्धता।
प्रेसमड खाद के वितरण।
लगभग 2000 एकड़ मंय उन्नत गन्ना बीज अउ सीडलिंग के विस्तार।
श्रमिक मन बर 5 रुपिया मंय भोजन योजना।
मुख्य आंकड़ा एक नजर मंय
एफआरपी भुगतान – 84.18 करोड़ रुपिया
▪ अतिरिक्त रिकवरी राशि – 22.92 करोड़ रुपिया
▪ कुल भुगतान – 107.10 करोड़ रुपिया
▪ जून मंय अंतिम भुगतान – 29.83 करोड़ रुपिया
▪ शुगर रिकवरी – 12.09 प्रतिशत
▪ उन्नत गन्ना क्षेत्र – लगभग 2000 एकड़
▪ श्रमिक भोजन योजना – 5 रुपिया मंय भोजन
▪ कृषक प्रतीक्षालय – बलराम सदन
समय मंय भुगतान, किसान हितैषी योजना अउ सहकारिता के मजबूत मॉडल के चलते भोरमदेव शक्कर कारखाना आज क्षेत्र के ग्रामीण अर्थव्यवस्था अउ किसान समृद्धि के प्रमुख आधार बन गे हे।
