कवर्धाछत्तीसगढ़

आस्था अउ उमंग के बीच साईं नगर के महिलामन हावंला रुख के करिन पूजा-अरचना।

कृषि महाविद्यालय रायपुर के नर्सरी मं तनु साहू के सौजन्य ले होइस आयोजन, पूजा-पाठ संग मनोरंजक खेल के घलो उठाइन आनंद

**रायपुर।** धार्मिक आस्था, परंपरा अउ आपसी मेल-मिलाप के सुंदर नजारा ओ समय देखे बर मिलिस, जब साईं नगर के महिलामन तनु साहू के सौजन्य ले कृषि महाविद्यालय के नर्सरी मं हावंला रुख के विधि-विधान के संग पूजा-अरचना करिन। ए अवसर मं महिलामन परिवार के सुख-समृद्धि, खुशहाली अउ मंगल कामना करत पूजा-पाठ करिन।

 

कार्यक्रम मं महिलामन अपन-अपन घर ले अलग-अलग किसिम के पकवान अउ प्रसाद बनाके लाय रहिन। हावंला रुख के नीचे परंपरागत रीति-रिवाज के संग पूजा-पाठ कर भगवान विष्णु अउ माता लक्ष्मी के सुमिरन करिन। धार्मिक मान्यता के अनुसार हावंला रुख मं भगवान विष्णु के वास माने जाथे। महिलामन पूरा श्रद्धा अउ भक्ति भाव के संग पूजा-अरचना करके अपन परिवार के सुख-शांति के कामना करिन।

 

पूजा के बेरा हावंला के पाना कोनो के ऊपर गिरना ला महिलामन भगवान के आशीर्वाद मानिन। पूजा संपन्न होय के बाद जम्मो झन मिलके भोग अउ प्रसाद ग्रहण करिन। एखर बाद मनोरंजक खेल के आयोजन घलो होइस, जेमां महिलामन बड़े उत्साह के संग हिस्सा लीन। हंसी-खुशी अउ उमंग के माहौल मं आयोजित ए कार्यक्रम ह सबो झन ला आपसी मेल-मिलाप अउ आनंद के यादगार पल दे गिस।

 

आस्था, परंपरा अउ मनोरंजन ले भरे ए आयोजन ह साईं नगर के महिलामन ला एक-दूसर ले जुड़े के बढ़िया अवसर देइस। पूरा कार्यक्रम मं उत्साह अउ उल्लास के माहौल बने रहिस।

**इनकर रही विशेष उपस्थिति**

कार्यक्रम मं तनु साहू, पिंकी, लक्ष्मी, दुर्गा शर्मा, दिव्या, खुशबू, मालती, क्षमा, अंतिमा, द्रोपदी, मीना, नूरजहां, निशा सोनी, मोनिका अउ वत्सला नायर सहित साईं नगर के बड़ी संख्या मं महिलामन के उपस्थिति रही।

 

Related Articles

Back to top button