बल्लूराम डॉट कॉम
विजय धृतलहरे
कवर्धा, 27 जुलाई। भारतीय जनता पार्टी जिला कबीरधाम के नवीन जिला कार्यालय मं सोमवार के दिन संत शिरोमणि गुरु रविदास महाराज के 650वीं जयंती के अवसर मं समरसता-संकल्प अभियान अउ घर-घर तिरंगा यात्रा के तैयारी बर संयुक्त जिला कार्यशाला के आयोजन करे गीस। कार्यशाला मं अभियान के रूपरेखा, संगठन के तैयारी अउ सामाजिक समरसता के संदेश ला गांव-गांव तक पहुंचाय बर विस्तार ले चर्चा होइस।
कार्यक्रम के शुरुआत भारत माता, पंडित दीनदयाल उपाध्याय अउ डॉ. श्यामा प्रसाद मुखर्जी के तैलचित्र मं दीप जलाके करे गीस।
मुख्य वक्ता अउ अहिवारा विधायक डोमन लाल कोर्यवाड़ा कहिन कि जब समाज मं बुराई बढ़थे, तब संत अउ महापुरुष समाज ला नई दिशा देखाथें। ओमन संत रविदास, संत कबीरदास अउ गुरु घासीदास के समानता, समरसता अउ स्वाभिमान के संदेश ला आज घलो समाज बर बहुत जरूरी बताइन। ओमन कहिन कि भाजपा दलित, गरीब अउ वंचित समाज के सम्मान अउ उत्थान बर लगातार काम करत हवय।
दुर्ग संभाग संगठन प्रभारी जगन्नाथ पाणिग्रही बताइन कि संत रविदास महाराज के 650वीं जयंती के अवसर मं भाजपा छह महीना तक समरसता-संकल्प अभियान चलाही। ए दौरान गांव-गांव कार्यक्रम होही अउ घर-घर तिरंगा अभियान के माध्यम ले हर घर मं राष्ट्रध्वज के सम्मान अउ देशभक्ति के भावना ला मजबूत करे जाही।
भाजपा जिला अध्यक्ष राजेंद्र चंद्रवंशी कार्यकर्ता मन ला संबोधित करत कहिन कि संत रविदास के विचार अउ संदेश ला समाज के आखिरी व्यक्ति तक पहुंचाय अभियान के मुख्य उद्देश्य हवय। ओमन सब्बो कार्यकर्ता मन ला पूरा निष्ठा अउ समर्पण के संग अभियान ला सफल बनाय बर आह्वान करिन।
कार्यशाला मं पूर्व विधायक मोतीराम चंद्रवंशी, जिला पंचायत अध्यक्ष ईश्वरी साहू, प्रदेश प्रवक्ता जसविंदर बग्गा, पूर्व जिला अध्यक्ष रामकुमार भट्ट, जिला उपाध्यक्ष परेटन वर्मा अउ अशोक चंद्रवंशी, जिला महामंत्री मुकेश ठाकुर, नगर पालिका अध्यक्ष चंद्र प्रकाश चंद्रवंशी, महिला मोर्चा अध्यक्ष विजय लक्ष्मी तिवारी सहित भाजपा के पदाधिकारी, मंडल अध्यक्ष, प्रकोष्ठ संयोजक अउ बड़ी संख्या मं कार्यकर्ता मन मौजूद रहे !
