बल्लूराम डॉट कॉम
विजय धृतलहरे
कवर्धा, 18जुलाई 2026। छत्तीसगढ़ सरकार ह आम जनता ला सुविधा देय बर सेवा-सेतु पोर्टल के माध्यम ले राशन कार्ड से जुड़े काम ला ऑनलाइन कर दे हे। अब अंत्योदय, प्राथमिकता, एकल निराश्रित अउ निःशक्तजन राशन कार्ड बर नवा आवेदन, परिवार मं सदस्य जोड़े अउ सदस्य के नाम हटाय के काम घर बइठे ऑनलाइन करे जा सकही। हितग्राही मन लोक सेवा केंद्र जाके घलो आवेदन कर सकथें, नइ त खुदे सेवा-सेतु पोर्टल मं आवेदन भर सकथें।
अंत्योदय राशन कार्ड बर पात्र हितग्राही मन ला अपन श्रेणी मुताबिक जरूरी प्रमाण-पत्र जमा करे ला होही। एहीच प्रकार प्राथमिकता राशन कार्ड बर भूमिहीन कृषि मजदूर, सीमांत अउ लघु किसान, असंगठित श्रमिक अउ पंजीकृत निर्माण श्रमिक मन ला घलो संबंधित अधिकारी के प्रमाण-पत्र देना जरूरी रहिही।
लोक सेवा केंद्र ले आवेदन करे मं 30 रुपिया सेवा शुल्क लगही। आवेदन जमा होय के बाद हितग्राही ला रसीद क्रमांक मिलही, जेन ले वो अपन आवेदन के स्थिति देख सकही। आवेदन के जांच अउ सत्यापन के बाद पात्र पाए जाए मं डिजिटल हस्ताक्षर सहित राशन कार्ड जारी कर दीही।
हितग्राही अपन राशन कार्ड के प्रति संबंधित कार्यालय, लोक सेवा केंद्र या सेवा-सेतु पोर्टल ले डाउनलोड कर सकथें। राशन कार्ड जारी होय के बाद परिवार के जम्मो सदस्य मन के ई-केवाईसी उचित मूल्य दुकान या फेस ई-केवाईसी के माध्यम ले करवाना अनिवार्य रहिही।
कलेक्टर गोपाल वर्मा ह जिले के नागरिक मन ले अपील करे हें कि पात्र परिवार मन ऑनलाइन सुविधा के लाभ उठावत समय मं आवेदन करंय। ए सुविधा के जानकारी गांव-गांव पहुंचाय बर उचित मूल्य दुकान, ग्राम पंचायत अउ नगरीय निकाय मं बैनर-पोस्टर लगाय जाही, संगही इलेक्ट्रॉनिक अउ प्रिंट मीडिया के माध्यम ले घलो व्यापक प्रचार-प्रसार करे जाही।
