बल्लूराम डॉट कॉम
विजय धृतलहरे
सहसपुर लोहारा, 10 जुलाई। कबीरधाम जिला के लोहारा पुलिस धान खरीदी मं होय कथित गड़बड़ी ऊपर बड़े कार्रवाई करत तीन धान उपार्जन केंद्र—सहसपुर लोहारा, बासिनझोरी अऊ बिरनपुर कला—मं करीब 81 लाख 19 हजार 502 रुपिया के आर्थिक गड़बड़ी के मामला दर्ज करे हवय।
पुलिस के मुताबिक धान खरीदी के बखत समिति प्रबंधक, फड़ प्रभारी अऊ कंप्यूटर ऑपरेटर मन मिलके धान अऊ खाली बारदाना के अमानत मं खयानत करके शासन ला भारी नुकसान पहुंचाय हवंय। ए मामला मं भारतीय न्याय संहिता (बीएनएस) के धारा 318(4), 316(5) अऊ 3(5) के तहत अलग-अलग अपराध दर्ज करे गे हवय।
जांच के दौरान मुख्य आरोपी समिति प्रबंधक गंगादास मानिकपुरी के घर तलाशी लेय गीस। तलाशी मं करीब 16 लाख रुपिया नगद, अलग-अलग बैंक के पासबुक, एक लैपटॉप अऊ सीपीयू जब्त करे गे। पुलिस पहुंचे के पहिलीच आरोपी फरार होगे रहिस।
पुलिस बताइस कि नगद रकम कहां ले आय रहिस, ए बात के जानकारी परिवार वाले मन घलो नई दे सकिन। परिवार के कहना हवय कि रकम गंगादास केच रहिस, फेर रकम के स्रोत के बारे मं उनला कछु जानकारी नइये।
ए मामला मं सहसपुर लोहारा, बासिनझोरी अऊ बिरनपुर कला धान खरीदी केंद्र के समिति प्रबंधक, फड़ प्रभारी अऊ कंप्यूटर ऑपरेटर सहित कई लोगन ऊपर अपराध दर्ज करे गे हवय। फिलहाल सब्बो फरार आरोपी मन के खोजबीन जारी हवय अऊ पुलिस अपन सूचना तंत्र के मदद ले जल्द गिरफ्तारी करे के बात कहिस।
कबीरधाम पुलिस अधीक्षक धर्मेंद्र सिंह के निर्देशन, अतिरिक्त पुलिस अधीक्षक पुष्पेंद्र बघेल अऊ अमित पटेल के मार्गदर्शन, एसडीओपी कृष्ण कुमार चंद्राकर के दिशा-निर्देशन मं थाना प्रभारी मनीष मिश्रा के नेतृत्व मं ए कार्रवाई करे गे हवय। पुलिस के कहना हवय कि धान खरीदी मं गड़बड़ी करे वाला मन ऊपर आगे घलो कड़ा कार्रवाई जारी रही।
