कवर्धा। आल इंडिया फेयर प्राइस शॉप डीलर फेडरेशन के राष्ट्रीय उपाध्यक्ष विजय धृतलहरे कहिन कि भारत सरकार के द्वारा 31 मार्च 2031 तक 80 करोड़ गरीब जनता ला मुफ्त अनाज देय के फैसला गरीब मन बर सराहनीय कदम हे, फेर रासन दुकानदार मन बर सिरिफ 10 पैसा प्रति किलो कमीशन बढ़ोत्तरी करना निराशाजनक अऊ असंतोषजनक हे।
ओमन कहिन कि देशभर के करीब 6 लाख रासन दुकानदार कई साल ले कमीशन बढ़ाय के मांग करत आवत हें, फेर सरकार ओमन के जायज मांग ला नजरअंदाज करके सिरिफ 10 पैसा प्रति किलो बढ़ोत्तरी करके दुकानदार मन संग मजाक करे हवय। बढ़त महंगाई, संचालन खर्च अऊ कई साल ले लंबित मांग मन के बीच ए बढ़ोत्तरी “ऊंट के मुंह म जीरा” जइसन हे।
विजय धृतलहरे कहिन कि कोरोना जइसन कठिन समय म रासन दुकानदार मन अपन जान जोखिम म डालके 80 करोड़ गरीब मन तक समय म रासन पहुंचाय के काम करिन। ए दौरान कई दुकानदार मन के मौत घलो होइस, फेर सरकार मृतक दुकानदार परिवार मन के सुध लेय ला जरूरी नई समझिस।
ओमन बताइन कि हाल ही म आल इंडिया फेयर प्राइस शॉप डीलर फेडरेशन के राष्ट्रीय महासचिव बिशम्भर बसु के नेतृत्व म प्रतिनिधिमंडल दिल्ली म केंद्रीय खाद्य मंत्री संग भेंट करके कमीशन बढ़ोत्तरी, अतिरिक्त मार्जिन राशि सीधे खाताम देय सहित कई मांग मन के ज्ञापन सौंपे रहिस। मंत्री जी मांग मन ला जायज बताके समाधान के भरोसा दे रहिन, फेर अब तक कोनो ठोस फैसला नई होय हे।
राज्य सरकार ऊपर नाराजगी जतावत विजय धृतलहरे कहिन कि छत्तीसगढ़ म 2005 ले लागू TPDS व्यवस्था के बाद आज तक रासन दुकानदार मन के कमीशन म कोनो उल्लेखनीय बढ़ोत्तरी नई होय हे। अभी शक्कर म सिरिफ 5 रुपिया प्रति क्विंटल अऊ चांउर म 30 रुपिया प्रति क्विंटल कमीशन मिलत हे, जबकि नमक, मध्यान्ह भोजन अऊ पूरक पोषण जइसन अतिरिक्त काम घलो करवाय जाथे।
ओमन कहिन कि शासकीय रासन दुकानदार एवं विक्रेता कल्याण संघ छत्तीसगढ़ कई बार सरकार ला ज्ञापन सौंपे हवय, फेर आज तक एक पैसा घलो बढ़ोत्तरी नई होना दुकानदार मन संग अन्याय हे।
अंत म विजय धृतलहरे केंद्र अऊ राज्य सरकार ले मांग करिन कि सार्थक PDS योजना अंतर्गत रासन दुकानदार मन ला कम से कम 250 रुपिया प्रति क्विंटल कमीशन बढ़ोत्तरी अऊ 2 प्रतिशत क्षतिपूर्ति राशि देय जाय, ताकि दुकानदार अऊ ओकर परिवार मन ला आर्थिक न्याय मिल सके।
