सुदूर वनांचल भुरसीपकरी मं कलेक्टर के रात्रि चौपाल, बैगा समाज संग जमीन म बइठ के सुने समस्या, पानी खातिर बनही सेनेटरी वेल

बल्लूराम डॉट कॉम -: विजय कुमार धृतलहरे 

कवर्धा, 1 अप्रैल 2026:
जिला के आखिरी छोर म बसे बोड़ला विकासखंड के सुदूर वनांचल गांव भुरसीपकरी मं कलेक्टर श्री गोपाल वर्मा खुद पहुंच के रात्रि चौपाल लगाइन। वो मन बैगा आदिवासी मन संग जमीन म बइठ के सीधा बातचीत करिन अऊ गांव के समस्या मन ला ध्यान से सुनिन।

चौपाल मं गांव वाले मन खास करके पीये के पानी के दिक्कत बताइन। गरमी के दिन मं पानी खातिर डेढ़ किलोमीटर दूर झिरिया ले पानी लाना पड़थे, जेकर से बहुत परेशानी होथे। ये बात सुनके कलेक्टर तुरते समाधान बर कदम उठाय के निर्देश दिहिन।

कलेक्टर बताइन कि झिरिया मं अब सेनेटरी वेल बनाही, जेमं मोटर पंप लगाके पाइपलाइन के माध्यम ले गांव मं पानी पहुंचाय जाही। ये योजना के प्रस्ताव बनाके शासन ला भेजे गे हे। एही तरह के दिक्कत झेलत अउ गांव मन बर घलो सर्वे करके योजना बनाय जावत हे, ताकि सालभर साफ पानी मिल सकय।

पीएचई विभाग के कार्यपालन अभियंता दिलीप राजपूत बताइन कि अभी गांव मं 3 सोलर पंप ले पानी सप्लाई होवत हे, फेर गरमी मं पानी के लेवल नीचे गिर जाथे, एसे दिक्कत होथे। नई योजना ले अब सालभर पानी मिलही।

कलेक्टर जनमन योजना के तहत आवास निर्माण के प्रगति के घलो जायजा लिहिन। गांव मं 142 मकान स्वीकृत हें, जेमं 83 बन गे हें, 55 बनत हें अऊ 4 अभी सुरू नई होय हें। कलेक्टर निर्देश दिहिन कि जिनला पैसा मिल गे हे, वो मन तुरते काम सुरू करंय अऊ समय मं पूरा करंय।

राशन व्यवस्था मं गांव वाले मन बताइन कि नियमित राशन मिलत हे। एक महिला के राशन कार्ड दूसर गांव मं बने रहिस, जेला सुधार करे बर कलेक्टर सचिव ला तुरते कार्रवाई करे के निर्देश दिहिन।

राजस्व अऊ दूसर योजना से जुड़ी आवेदन मन घलो ग्रामीण मन देइन, जेमं नामांतरण के दिक्कत प्रमुख रहिस। कलेक्टर अधिकारी मन के टीम बनाके समय मं समाधान करे के निर्देश दिहिन।

स्वास्थ्य सुविधा मं नर्स के कमी के बात उठिस, जेला दूर करे बर सीएमएचओ संग समन्वय करके व्यवस्था करे के निर्देश दिहिन।

ए रात्रि चौपाल मं जिला पंचायत सीईओ अभिषेक अग्रवाल, डिप्टी कलेक्टर आरबी देवांगन सहित कई अधिकारी अऊ भारी संख्या मं ग्रामीण मन मौजूद रहिन।