बल्लूराम डॉट कॉम
विजय धृतलहरे
रायपुर, 27 मार्च 2026: रामनवमी के पावन अवसर मं राजधानी रायपुर फेर एक बेर राममय होय बर तैयार हे। शिवसेना के तत्वाधान मं 28 मार्च ला भव्य अऊ ऐतिहासिक शोभायात्रा निकाले जाही, जेमां छत्तीसगढ़ भर ले हजारों श्रद्धालु अऊ शिवसैनिक मन जोश अऊ उमंग संग शामिल हो हीं।
शिवसेना के जिला अध्यक्ष अऊ छत्तीसगढ़ उपप्रमुख कबीरधाम के प्रकाश वर्मा बताइन कि शोभायात्रा के शुभारंभ शहर के प्रसिद्ध विट्ठल मंदिर, फूल चौक नवीन बाजार ले होही। ए दौरान पूरा शहर मं “जय श्रीराम” के जयकारा गूंज उठही अऊ वातावरण भक्ति अऊ उत्साह ले भर जाही।
ए शोभायात्रा के खास बात ये रहिही कि ए मं भगवान श्री राम के भव्य झांकी संग छत्तीसगढ़ी लोकसंस्कृति के मनमोहक प्रस्तुति देखे ला मिलही। ढोल-नगाड़ा, धुमाल अऊ डीजे के संग पंथी नृत्य, राउत नाचा, सुवा नृत्य अऊ आदिवासी नृत्य के रंगारंग झलक मन जन-जन के मन ला मोह लेही।
ए महाआयोजन ला सफल बनाय बर कबीरधाम जिला के अलग-अलग क्षेत्र मं जिम्मेदारी बांटे गेन हे। दशरंगपुर ले प्रदीप केशरवानी, बोड़ला ले अनिल चंद्राकर, लोहारा ले भूखरुदास डहरिया अऊ पंडरिया ले देवप्रसाद अऊ तीरथराम साहू जइसने कार्यकर्ता मन पूरा समर्पण संग तैयारी मं जुटे हवंय।
शिवसेना के पदाधिकारी मन ह आम जनता ले भावुक अपील करिन हें कि ए भव्य रामनवमी शोभायात्रा मं भारी संख्या मं शामिल होके आयोजन ला ऐतिहासिक बनावंव अऊ रामभक्ति के संदेश ला दूर-दूर तक पहुंचावंव।
