पंडरिया। जनपद पंचायत पंडरिया के सभा हाल मं आज तहसील भर के उचित मूल्य दुकान संचालक मन के महत्वपूर्ण बैठक आयोजित होइस। बैठक मं खाद्य निरीक्षक हिमांशू केशरवानी पहले ले ही सब्बो दुकानदार मन ल 11 बजे तक उपस्थित होय बर निर्देश दे रहिस, जेन ला पालन करत सबो दुकानदार समय मं पहुंचिन।जऊन दुकानदार अनुपस्थित रहिन, ओमन ऊपर नाराजगी जतावत नोटिस जारी करे के बात कहे गीस।
बैठक मं खाद्य निरीक्षक हिमांशू केशरवानी सख्त रुख अपनावत e-KYC 100% पूरा काबर नइ होय ये बात ऊपर दुकानदार मन ले स्पष्टीकरण मांगिन। जेन दुकानदार मन समय मं डी.डी. जमा नइ करिन, ओमन ल फटकार लगावत तुरंत जमा करे बर कहिन। संग ही राशन वितरण 100% समय मं करे के कड़ा निर्देश दे गिस।
दुकानदार मन अपन समस्या घलो सामने रखिन। ओमन बताइन के बहुत उपभोक्ता मन e-KYC मं ध्यान नइ देत हें, संग ही पलायन, मृत्यु अउ आधार/फिंगर अपडेट नइ होय के कारण काम मं दिक्कत आथे। ए पर खाद्य निरीक्षक कहिन के दुकानदार मन राशन कार्ड अनुसार कारण लिखित मं देवं, ताकि विभाग तक बात पहुंचाय जा सके।
भंडारण मं होवत नुकसान के बात घलो उठिस, जेन पर खाद्य निरीक्षक सही एंट्री, वितरण अउ भंडारण के नियम पालन करे बर जोर दिन। संग ही जांच दल गठित करके औचक निरीक्षण अउ वजन मेमोरेंडम जांच के बात कहिन, ताकि दुकानदार मन ल नुकसान ले राहत मिल सके।
वेयरहाउस के समस्या जइसे – धर्मकांटा खराब होय, दू दुकान के माल एके गाड़ी मं लोडिंग, अउ पहले सूचना नइ देना – ल गंभीरता ले लेते सुधार करे के भरोसा दे गिस।
बैठक के दौरान ग्राम पंचायत बुचीपारा के विक्रेता विरेन्द्र कुमार के सड़क दुर्घटना मं निधन होय पर 2 मिनट के मौन धारण करके श्रद्धांजलि अर्पित करे गिस।
ए अवसर मं शासकीय राशन दुकानदार एवं विक्रेता कल्याण संघ, तहसील पंडरिया के अध्यक्ष विजय धृतलहरे मृतक के परिवार बर आर्थिक सहायता करे के अपील करिन। संघ के सदस्य मन सहयोग करत, राशि ल परिवार तक पहुंचाय बर संकल्प लेहिन।
👉 कुल मिलाके, बैठक मं खाद्य व्यवस्था ल दुरुस्त करे बर कड़ा संदेश दे गिस,अब नियम पालन नइ होही त सीधा कार्यवाही तय हे।
