कवर्धा, 16 फरवरी 2026। विजय कुमार धृतलहरे
जिला के सुदूर वनांचल इलाका मन म गर्भवती महतारी मन ला बेहतर स्वास्थ्य सुविधा देय के उद्देश्य ले निःशुल्क सोनोग्राफी जांच शिविर लगाय जात हे। बरस 2024-25 अऊ 2025-26 के दौरान जिला म लगाय गेय शिविर मन के माध्यम ले कुल 889 गर्भवती महतारी मन के सोनोग्राफी जांच हो चुके हे, जेन ले महतारी अऊ नवजात शिशु के स्वास्थ्य के नियमित निगरानी संभव होवत हे। ए पहल महतारी अऊ शिशु स्वास्थ्य ला मजबूत करे के दिशा म महत्वपूर्ण उपलब्धि साबित होवत हे।
राज्य सरकार के प्राथमिकता अनुसार, विष्णुदेव साय के मार्गदर्शन म गर्भवती महतारी मन ला घर के नजदीक स्वास्थ्य सुविधा उपलब्ध कराय बर प्राथमिक अऊ सामुदायिक स्वास्थ्य केंद्र मन म शिविर आयोजित करे गेय।
सबसे अधिक जांच सामुदायिक स्वास्थ्य केंद्र स. लोहरा म 203 महतारी मन के होइस।
प्राथमिक स्वास्थ्य केंद्र रेंगाखार म दू चरण म शिविर लगाके 238 महतारी मन ला लाभ मिलिस।
दुर्गम अऊ पहाड़ी क्षेत्र होय के बावजूद प्राथमिक स्वास्थ्य केंद्र तरेगांव जंगल म 146 जांच संपन्न होइस।
एखर अलावा सामुदायिक स्वास्थ्य केंद्र पिपरिया म 144, बोडला म 92 अऊ प्राथमिक स्वास्थ्य केंद्र चिल्फी म 66 गर्भवती महतारी मन लाभान्वित होइन।
गांव अऊ वनांचल इलाका मन म जानकारी अऊ साधन के कमी के कारण पहिली गर्भवती महतारी मन समय म सोनोग्राफी जांच नई करा पावत रहिन। अब ए शिविर मन के माध्यम ले गर्भ म पलत लइका के विकास के सही जानकारी समय म मिलत हे। कऊनो भी प्रकार के खतरा या जटिलता के पहचान प्रारंभिक चरण म हो जाथे, जेन ले इलाज घलो समय म संभव हो पावत हे।
स्थानीय स्तर म आधुनिक जांच सुविधा उपलब्ध होय ले महतारी मन के भरोसा बढ़िस अऊ सुरक्षित प्रसव बर मजबूत आधार बनिस। सोनोग्राफी शिविर मन वनांचल इलाका के गर्भवती महतारी मन के जीवन म सकारात्मक बदलाव लावत हवंय।
