बल्लूराम डॉट कॉम
विजय धृतलहरे
कवर्धा, 30 जुलाई 2026। आबकारी विभाग ह बीते 35 दिन म 143 छापामार कार्रवाई, 113 प्रकरण दर्ज करे अउ 145.81 बल्क लीटर अवैध दारू जप्त करे के दावा करे हवय। विभाग के कहना हे कि अवैध दारू के बनई, ढुलाई अउ बिक्री ऊपर लगातार अभियान चलाय जात हवय।
फेर दूसर पाछू जमीनी हकीकत कुछ अउच कहानी कहिथे। कबीरधाम जिला के कई गांव मन म आज घलो कोचिया मन खुलेआम अवैध दारू बेचत हें। गांव के लोगन के कहना हे कि कार्रवाई के आंकड़ा त बढ़िया दिखत हे, फेर गांव-गांव म दारू आसानी ले मिलत हवय।
ग्रामीण मन के सवाल हे कि जब आबकारी विभाग लगातार छापा मारत हवय, त फेर कोचिया मन बेखौफ होके अवैध दारू कइसे बेचत हें? अगर सच म कड़ाई होवत रहितिस, त गांव मन म अवैध दारू के बिक्री ऊपर लगाम दिखना चाही रहिस।
लोगन के आरोप हे कि कभू-कभार एक-दू मामला बना देय जाथे, फेर बड़े नेटवर्क ऊपर प्रभावी कार्रवाई कम दिखत हवय। एही से अवैध दारू के कारोबार बंद होय के बदला लगातार चलत रहिथे।
जिला के नागरिक मन प्रशासन ले मांग करत हें कि सिरिफ आंकड़ा जारी करे ले काम नइ चलही। गांव-गांव म सक्रिय कोचिया मन ऊपर लगातार अउ निष्पक्ष कार्रवाई होय, तभे अवैध दारू के कारोबार म सही मायने म रोक लग सकही।
