बल्लूराम डॉट कॉम
विजय धृतलहरे 30/06/2026
पंडरिया। पंडरिया विधायक भावना बोहरा ह गन्न किसान मन ला भरोसा देत कहिन कि लौह पुरुष सरदार वल्लभभाई पटेल सहकारी शक्कर कारखाना, पंडरिया मं गन्ना बेचे किसान मन के बकाया रकम के पूरा भुगतान जुलाई ले अगस्त महिना के भीतर कर दे जाही।
विधायक भावना बोहरा कहिन कि किसान मन के मेहनत के कमाई समय मं मिलय, ए सरकार के पहिली प्राथमिकता हे। एही से राज्य सरकार, सहकारिता विभाग अउ कारखाना प्रबंधन लगातार समन्वय करत हवय, ताकि भुगतान प्रक्रिया ला तेज अउ समयबद्ध बनाय जा सके।
ओमन बताइन कि शासन स्तर मं ए प्रस्ताव रखे गे हवय कि शुगर मिल मं रखाय चीनी के स्टॉक के मूल्य बराबर अग्रिम राशि उपलब्ध कराय जावय, जेन ले किसान मन के भुगतान जल्दी हो सकय।
विधायक बताइन कि पिछले ढाई साल मं शक्कर कारखाना के आर्थिक स्थिति मजबूत करे बर कई ठोस कदम उठाय गे हवंय। स्थापना खर्च ₹15.06 करोड़ ले घटके ₹9.65 करोड़, अउ अनुरक्षण व मरम्मत खर्च ₹10.97 करोड़ ले घटके ₹4.13 करोड़ होगे हवय। जरूरत मुताबिक कर्मचारी संख्या कम करे गेय हवय अउ अलग-अलग खर्चा मं नियंत्रण करके लगभग ₹16 करोड़ के अतिरिक्त बचत घलो करे गे हवय।
भावना बोहरा कहिन कि भाजपा सरकार बनई के बाद गन्ना किसान मन के भुगतान प्रक्रिया मं तेजी आय हवय। कारखाना के आय बढ़ाय बर मोलासिस के बिक्री बेहतर बाजार भाव मं करे गे हवय, जेन ले कारखाना के आर्थिक स्थिति मजबूत होवत हवय अउ ओकर सीधा फायदा किसान मन ला मिलही।
विधायक कहिन कि सरकार के मकसद सिरिफ गन्ना खरीदी नइ, बल्कि किसान मन के भरोसा ला कायम रखना घलो हे। सरकार किसान हित मं कऊनो समझौता नइ करही अउ हर गन्ना उत्पादक ला ओकर मेहनत के उचित दाम समय मं मिले, ए खातिर पूरा प्रतिबद्धता के संग काम करत हवय।
भावना बोहरा आखिर मं फेर किसान मन ला भरोसा देवत कहिन कि सरकार किसान मन के हर चिंता प्रति संवेदनशील हवय अउ बकाया गन्ना भुगतान के प्रक्रिया जल्दी पूरा करके किसान मन ला राहत देय बर जरूरी सब्बो कदम उठाए जात हवय।
