बल्लूराम डॉट कॉम
विजय कुमार धृतलहरे
कवर्धा 05/06।2026- विश्व पर्यावरण दिवस के अवसर म छत्तीसगढ़ जर्नलिस्ट यूनियन के द्वारा वन मंडल कबीरधाम के सहयोग ले करिया आमा जंगल सफारी म प्रेरणादायी पौधारोपण कार्यक्रम के आयोजन करे गीस। ए अवसर म पत्रकार, वन विभाग के अधिकारी-कर्मचारी अऊ नागरिक मन मिलके पर्यावरण संरक्षण, जैव विविधता बचाय अऊ प्रकृति प्रति अपन जिम्मेदारी निभाय के संदेश दिन।
कार्यक्रम के शुरुआत पौधारोपण ले होइस, जिहां जंगल सफारी परिसर म विभिन्न प्रकार के छायादार अऊ फलदार पौधा लगाय गीस। कार्यक्रम म छत्तीसगढ़ जर्नलिस्ट यूनियन के कार्यकारी प्रदेश अध्यक्ष भुवन पटेल, जिला अध्यक्ष श्याम टंडन, वरिष्ठ पत्रकार डी.एन. योगी, ग्राम पंचायत चौरा के सरपंच श्रीमती दुर्गा लांझी, भोरमदेव अभ्यारण्य के सहायक परिक्षेत्र अधिकारी जय बंजारे सहित बड़ी संख्या म पत्रकार, वन विभाग के अधिकारी-कर्मचारी अऊ आम नागरिक उपस्थित रहिन।
कार्यकारी प्रदेश अध्यक्ष भुवन पटेल अपन संबोधन म कहिन कि प्रकृति अऊ मानव जीवन के रिश्ता बहुत गहिरा हवय। पर्यावरण सुरक्षित रहिही तभे मानव सभ्यता के भविष्य सुरक्षित रहिही। ओमन कहिन कि आज पूरा दुनिया जलवायु परिवर्तन अऊ ग्लोबल वार्मिंग जइसन गंभीर समस्या ले जूझत हवय, एखर समाधान बर समाज के हर व्यक्ति ला अपन जिम्मेदारी समझना जरूरी हवय।
जिला अध्यक्ष श्याम टंडन कहिन कि जंगल, पानी अऊ जमीन हमर जीवन के आधार हवंय। आज बढ़त प्रदूषण अऊ घटत वन क्षेत्र के कारण पर्यावरण संतुलन बिगड़त हवय, एसेती पौधारोपण समय के सबसे बड़े जरूरत बन गे हवय। ओमन युवा अऊ विद्यार्थी मन ला पर्यावरण संरक्षण ला जन आंदोलन बनाय के आह्वान करिन।
रिष्ठ पत्रकार डी.एन. योगी कहिन कि पर्यावरण बचाय केवल सरकार के जिम्मेदारी नइये, बल्कि समाज के हर व्यक्ति के जिम्मेदारी आय। ओमन कहिन कि पत्रकारिता केवल समाचार तक सीमित नइये, बल्कि समाज म जागरूकता फैलाय अऊ सकारात्मक बदलाव लाय के माध्यम घलो आय।
ग्राम पंचायत चौरा के सरपंच श्रीमती दुर्गा लांझी कहिन कि गांव अऊ प्रकृति के रिश्ता सदियों ले अटूट रहिस हे। ओमन लोगन मन ला अपन घर, खेत अऊ सार्वजनिक जगह म जियादा ले जियादा पौधा लगाय अऊ ओकर देखभाल करे के अपील करिन।
भोरमदेव अभ्यारण्य के सहायक परिक्षेत्र अधिकारी जय बंजारे जंगल अऊ जैव विविधता के महत्व ऊपर जानकारी देत कहिन कि वन केवल हरियाली के प्रतीक नइये, बल्कि जल संरक्षण, वर्षा चक्र अऊ वन्यजीव संरक्षण बर घलो जरूरी हवंय।
कार्यक्रम के आखिर म उपस्थित सबो लोगन पर्यावरण संरक्षण के संकल्प लेइन अऊ लगाय गे पौधा मन के सुरक्षा अऊ देखभाल करे के वचन दिन। करिया आमा जंगल सफारी के प्राकृतिक वातावरण म आयोजित ए कार्यक्रम समाज के सामूहिक जिम्मेदारी अऊ पर्यावरण प्रति जागरूकता के सुंदर उदाहरण बनके सामने आइस।
विश्व पर्यावरण दिवस म आयोजित ए कार्यक्रम ले ये संदेश मिलिस कि प्रकृति के संरक्षण एक दिन के काम नइये, बल्कि लगातार चलत रहय वाला जिम्मेदारी आय।
